Алабугалы Алёна Чернова күршеләренә «Алабуга нуры» газетасына язылу бүләк итте

Газетабызның даими укучысы Алёна Чернова хәйрия акциясендә даими катнаша. Бу юлы ул үзенең күршеләре — Рәйсә апа Мәрданова белән Сания апа Гариповага «Алабуга нуры» газетасына язылу бүләк итте.

Рәйсә апа белән Сания апа — сугыш елы балалары. Алар авыр елларны кичергәннәр һәм, Алёна ханым сүзләренчә, тынычлыкның, җылы сүзнең һәм кешелеклелекнең бәясен яхшы беләләр.

Алёна Чернова безгә күршеләре белән инде күп еллар дус булып яшәве турында сөйләде. Аның сүзләренчә, Рәйсә апа да, Сания апа Гарипова да газетаны туган телләрендә зур теләк белән укыйлар, шуңа күрә ул даими рәвештә аларны «Алабуга нуры» на яздыра.

Сания Гарипова — күпбалалы гаиләдә үскән, үзе дә күпбалалы әни. Балалары аның турында кайгыртып яши һәм күрсәткән игътибары өчен Алёна ханымга һәрчак рәхмәт белдерә. Рәйсә Мәрданованың ире «Прикамнефть» оешмасында эшләгән, хезмәт алдынгысы булган.

Алёна Чернова билгеләп үткәнчә, аның күршеләре бик тату, бер-берсенә ярдәмләшеп яшиләр, бәйрәмнәрдә күршеләрен бәлешләр белән сыйлыйлар, бакча уңышы белән уртаклашалар. 

Алёна ханым сүзләренчә, газеталарга язылу бүләк итү — бу зур булмаган, әмма мөһим кайгыртучанлык билгесе.

Искәртеп үтәбез, хәйрия акциясе кысаларында теләге булган һәркем киләсе яртыеллыкка «Новая Кама» һәм «Алабуга нуры» газеталарына язылу бүләк итә ала. Аны әти-әниләргә, якыннарга, ветераннар, ялгыз яшәүче өлкәннәр, махсус операциядә катнашучының гаиләсе, күпбалалы гаилә яки изгелек эшлисе килгән теләсә кайсы кеше өчен рәсмиләштерергә мөмкин.