Алабугада элекке Мәдәният сараен танырлык түгел: матур фасад, мәрмәр баскычлар, заманча техник мөмкинлекләр — болар барысы соклану уята.
Объектның гомуми әзерлеге
Алабугада Мәдәният сараен капиталь ремонтлау төгәлләнеп килә. Озак еллар шәһәр халкының яраткан урыны булып хезмәт иткән бина тиздән кунакларны заманча якты залларында янәдән кабул итә алачак.
Хәзерге вакытта объектның әзерлеге 95 процент тәшкил итә, һәм сентябрь башына биредә беренче кунакларны каршы алачаклар. Үзәк залда декоратив рәсемнәр ясыйлар, аерым элементларны буяп, һәр детальне камиллеккә җиткерәләр. Бина танымаслык булып үзгәрде — биредә түбәдән алып фундаментка кадәр төзекләндерү эшләре үткәрелде.
Инде ниләр эшләнгән: фасад, түбә, идән һәм заллар
— Эшләр инде ахырына якынлаша, кайбер детальләрне эшләп бетерәсе калды, — дип аңлата Алабуга районы башкарма комитеты каршындагы төзелеш Департаменты директоры Константин Новый. — Идәнне тулысынча алыштырдык, түбәсен яңарттык, фасадны матур итеп витражлы пыяла белән бизәдек.
Хореография һәм репетиция заллары заманча җиһазландырылган. Баскычлар мәрмәр белән тышланган, бинаның стеналары һәм идәннәрендә бизәкләр ясалган.
Техник җиһазлау
Техник җиһазлау аеруча игътибарга лаек: вентиляция ясалган, утка чыдам өслек булдырылган, янгын турында заманча хәбәр итү системасы куелган. Республика программасыннан 128 миллион сумга яктылык-тавыш җайланмалары урнаштырылган. Үзәк залда зур LED-экран куелган, тагын ике экранны — фасадта һәм мәрмәр залда күрергә була.
Моннан тыш, үзәк залда махсус түшәм өслеге ясалган, стеналарда акустик панельләр куелган — хәзер монда тавыш идеаль яңгыраячак. Идән астындагы коммуникацияләре булмаган иске киштәләрне сүтеп, ком салганнар, бетон өслек ясаганнар һәм аның өстенә яңа керамогранит куйганнар.
Территорияне төзекләндерү, нәтиҗәләр
— Баскычларда фойедан киртә рәвешендә өстәмә пыялалар барлыкка килде, — дип өсти Константин Новый. — Хәзер бу бина матуррак, нәфисрәк күренә. Әлбәттә, яңартылган Мәдәният сарае шәһәрнең чын бизәге, бәйрәмнәр, концертлар һәм очрашулар өчен яраткан урын булачак.
Мәдәният сарае тирәсендәге территория дә үзгәрешләр кичерә. Биредә утлар белән яктыртылган музыкаль фонтан барлыкка киләчәк. Нефтьчеләр һәйкәле исә төзекләндереләчәк скверга күчерелде.
Нет комментариев