Старт бирелде: Алабуга игенчеләре уракка төште

Алабуга районы авыл хуҗалыгы һәм азык-төлек идарәсеннән алынган мәгълүматларга караганда, быел урып-җыю кампаниясенең гомуми планы 11 839 гектар тәшкил итә. Шуның 3 380 гектары — көзге культуралар, 8 459 гектары бөртекле сабан культуралары өчен бүлеп бирелгән. Бүгенге көнгә игенчеләр тарафыннан 1 072 гектар суктырылган инде, 3 828 тонна ашлык суктырылган, уңдырышлылык гектардан уртача 35,7 центнер тәшкил итә.

Алдынгылар рәтендә

Старт этабында «Вятские зори» агрофирмасы алдынгылар рәтендә, анда бүгенге көнгә уңдырышлылык гектарына 49,3 центнер булса, Әхмәтҗанов Ф. Г. крестьян-фермер хуҗалыгында бу күрсәткеч 35,2 центнерга тигез. «Светлая долина» хуҗалыгында көзге тритикале тулысынча җыеп алынды, монда нәтиҗә һәр гектардан 29,2 центнер тәшкил итә. Шушы көннәрдә «Аммоний АгроТехнологии» җәмгыяте дә көзге бодайны суктыруга керешәчәк. Калган хуҗалыклар сабан культуралары өлгерешенә карап эшкә кушыла.

«Светлая долина» кырларында

Уракның беренче этабы барышы белән танышу өчен без «Светлая долина» кырларында булып кайттык. Хуҗалык директоры урынбасары Тошпулат Маллаев эш барышы турында сөйләде.

— Хәзер урып-җыюга дүрт комбайн чыкты. Механизаторлар иртәдән алып кичкә кадәр эшли, уракның һәр минуты кадерле. Быел без кырларга 23 июльдә чыктык. Эшкә керешер алдыннан туфракның дымлылыгын үлчәү өчен аппарат кулланабыз. Бу төп индикатор: әгәр дым 17-18 проценттан артса, без көтәбез, түбәнрәк булса — тоткарланмыйча эшкә керешәбез. Уңыш мул, яңгырларга кадәр җыеп өлгерергә кирәк.

Хуҗалык планы буенча быел 500 гектарда уҗым культуралары һәм 1800 гектарда сабан культуралары җыеп аласы бар.

— Уңыш күз явын алырлык. Без кирәкле барлык агротехник чараларны: тукландыруны, корткычлардан саклауны вакытында башкардык. Кеше бар күңелен биреп, тырышып эшли икән, нәтиҗәсе дә лаеклы булачак, — дип билгеләп үтә Тошпулат Маллаев.

Табигать тә булыша

Быелгы сезонның уңышында һава торышы да аерым роль уйнады. Шәһәр халкы өчен борчу тудырган яңгырлар авыл халкы өчен чын бәхеткә әйләнде. Дым кырларга туклыклы элементлар китерде, туфракны туендырды һәм башакка көч бирде.

Урып-җыю кампаниясе районда көчәя бара. План тулы күләмдә һәм яхшы сыйфат белән үтәлергә тиеш. Кыр хезмәтчәннәре моның өчен бар тырышлыгын куячак.