Татарстанда хатын-кызлар кайсы очракларда вакытыннан алда пенсиягә чыга ала

Берничә бала тапкан хатын-кызлар пенсияләрен вакытыннан алда билгеләү хокукына ия. Татарстанда әниләргә нинди пенсия ташламалары бар — «Татар-информ» материалында.

Ике баласы булу

Ике бала тапкан хатын-кызлар вакытыннан алда пенсиягә чыгу хокукына ия, ләкин түбәндәге шартны үтәгәндә. Аның гомуми иминият стажы кимендә 20 ел булырга тиеш, шуларның 12 елын хатын-кыз ерак төньяк районнарында яки 17 елын — аларга тиңләштерелгән җирләрдә эшләгән булырга тиеш. Бу очракта Татарстанда яшәүче хатын-кыз пенсиягә 10 елга иртәрәк — 50 яшьтә чыгарга хокуклы.

Өч бала аналары өчен вакытыннан алда пенсиягә чыгу

Өч бала тапкан һәм аларны 8 яшькә кадәр тәрбияләгән аналар 57 яшь тулгач пенсиягә чыгуга исәп тота алалар. Әмма моның өчен кимендә 15 ел хезмәт стажы булырга тиеш

Дүрт бала булу

Балаларын 8 яшькә кадәр тәрбияләгән дүрт бала аналары да вакытыннан алда — 56 яшьтә пенсиягә чыга ала. Әмма моның өчен кимендә 15 ел эшләргә кирәк.

Биш бала өчен вакытыннан алда пенсия

Биш бала тапкан һәм тәрбияләгән хатын-кызлар 50 яшьтән пенсия белән тәэмин ителүгә исәп тотарга хокуклы. Әмма моның өчен шулай ук кимендә 15 ел иминият стажы булырга тиеш.

Моңа кадәр без Татарстанда яшәүче 6 меңнән артык кеше гариза бирмичә инвалидлык буенча пенсия алды дип язган идек.