Алабугада мәгариф учреждениеләрендә ремонт эшләренең барышы турында

Бүгенге көндә Поспелово авылы мәктәбендә һәм «Лесная сказка» 28нче балалар бакчасында түбә ремонтланып беткән инде. Бехтерево авылы мәктәбендә әлеге эш төгәлләнү стадиясендә. Хәзер биредә кабинетларны һәм коридорларны, фасадны бизәү эшләре капиталь ремонт федераль программасы кысаларында алып барыла.

1нче мәктәптә шул ук федераль программа буенча капиталь ремонт 80 процентка башкарылган. Мәктәпкә быел 40 ел, ремонтны биш елдан артык көттек, дип сөйләде мәктәп директоры Ләйсән Галиева.

— Хәзер беренче катыбыз матур һәм чиста булачак — стеналар штукатурланган инде, аларны буисы калды. Мәрмәр идән сыйфатлы, шуңа күрә аны алыштырмыйбыз, ләкин реставрациялибез. Бигрәк тә без география кабинеты өчен шат — түбәдән су үтү сәбәпле ул берничә ел ябык торды. Ниһаять, түбәне дә, кабинетны да ремонтладылар.

Кызлар өчен технология кабинетында да капиталь ремонт ясалды. Бу кухня гарнитуры һәм тегү машиналары булган заманча студия булачак. Моның өчен бөтен электриканы тулысынча алыштырырга туры килгән. Ватанны саклау һәм иминлек нигезләре дәресе кабинеты да яңартылган: биредә электрон тир, Калашников автоматы, кеше макеты, төрле җайланмалар муляжлары булачак. Һәм, ниһаять, барлык кабинетларга яңа җиһазлар урнаштырылачак.

6нчы мәктәптә «Эссен Продакшн АГ» җәмгыяте генераль директоры Леонид Барышев ярдәме белән спорт залын ремонтлыйлар. «Эссен» генераль директоры урынбасары Сергей Шарычев башта бинаның түбәсен ремонтларга туры килүе турында сөйләде.

— Спорт залы, чишенү бүлмәләре, ашханә, актлар залы — барлыгы 765 квадрат метр. Түбә авария хәлендә иде, даими рәвештә су үткән, бигрәк тә кыш көне кар җылыдан эрегән вакытта. Без аны яңарттык, җылыттык, махсус мембрана белән капладык. Әле ашханәдәге һава үткәргеч тә бик начар хәлдә иде — без аны да алыштырдык. Хәзер төп эшләрне алып барабыз.

6нчы мәктәп директорының хуҗалык өлеше буенча урынбасары Галина Семенычева сөйләгәнчә, ремонтны 15 елга якын көткәннәр.

— Спорт залында соңгы ремонтны без 1994 елда үз көчебез белән ясадык. Һәм безнең мәктәптә укыган Леонид Анатольевич Барышевның безгә ярдәм итәргә теләк белдерүе безнең өчен зур шатлык. Моның өчен аңа бик зур рәхмәт!

Спорт залларының мәйданы — 282 квадрат метр, эшләрнең якынча бәясе 8 миллион сум тәшкил итә. Эшләр мәктәп җитәкчелеге белән килешеп алып барыла. Башта түшәм һәм стеналар иске буяудан, шулай ук штукатурка кирпеч нигезенә кадәр чистартылган. Хәзер эшчеләр яңа штукатурка өчен урын әзерли, аннары буяу эшләре башланачак. Шулай ук агач түшәмәләрне һәм идән япмаларын алыштыралар. Чишенү бүлмәләрен ремонтлаячаклар һәм чиктәш биналарның стеналарын яңартачаклар.

«Купеческий городок» яңа балалар бакчасы төзелеше тулы куәтенә бара. Ата-аналар һәм нәниләр түземсезлек белән көткән объект быел ук үз ишекләрен ачачак.

Бүгенге көнгә төзүчеләр төп эшләрне башкарганнар. Тыштан фасадны җылыту һәм керамогранитны монтажлау эшләре төгәлләнү этабында. Эчке яктан идәннәр тарттырылган, стеналар штукатурланган, бизәү эшләре алып барыла. Инженерлык челтәрләре 90 процентка әзер.

Параллель рәвештә территорияне дә төзекләндерү бара. Эшчеләр тротуарлар һәм юллар сала, балалар өчен уен мәйданчыкларын монтажлый. Мәйдан эчендәге эшләрнең гомуми әзерлеге 60 процент дип бәяләнә. Бу хакта «АМР башкарма комитеты каршындагы төзелеш департаменты» учреждениясе директоры Константин Новый сөйләде.

Тышкы уңайлылыкка аерым игътибар бирелә. Балалар бакчасы коймасы буйлап тротуарны төзекләндерәләр, автомобильләр кую өчен урамны киңәйтәләр һәм тигезлиләр, ишегалды территориясен тәртипкә китерәләр.

Моннан тыш, Тарловканың 11нче мәктәбендә капиталь ремонтның беренче этабы башланды, 10нчы күппрофильле лицейда да эшләр бара. Шулай итеп, яңа уку елында Алабуга районы укучыларны һәм тәрбияләнүчеләрне яңартылган, уңайлы биналарда каршы алачак, биредә уку һәм үсү чын-чынлап уңайлы булачак.