Объектта төзелеш эшләренең төп өлеше инде төгәлләнгән: бинаның эчке бизәлеше якынча 95 процентка әзер.
Территорияне төзекләндерү дәвам итә
Хәзер белгечләр территорияне төзекләндерү һәм җиһазларны эшләтеп җибәрүгә әзерләү белән шөгыльләнә. Яңа комплексның нинди булачагы турында «Алабуга термалары» җәмгыятенең генераль директоры Тимур Басыров сөйләде.
Эшләр бина эчендә дә, аның тирә-ягында да бер үк вакытта алып барыла. Территориягә газон чәчеп, туя үсентеләре утырту планлаштырыла. Хәзерге койма соңрак сүтеләчәк, шуңа күрә төзекләндерү эшләреннән соң термалар территориясе ачык һәм тирә-юнь белән матур итеп ярашып торачак.
Ачык бассейн ел буе эшләячәк
Ачык һавада аерым ял зонасы да була. Монда ел әйләнәсе эшләячәк зур ачык бассейн урнаша. Аның тирәсендә шезлонглар, ә янәшәдә кайнар сулы фурако купельләре булачак. Территориянең бер өлешенә яшел ясалма газон салыначак.
Якындагы күпфатирлы йортта яшәүчеләр һәм терма кунаклары өчен территорияләр арасында махсус тавыш кайтаргыч койма урнаштыру күздә тотыла. Аның аскы өлеше үтә күренмәле булмый, ә өске өлеше яктылык керүне чикләмәс өчен үтә күренмәле итеп ясалачак.
Комплекс эчендә нәрсә урнашачак
Термаль үзәккә кергәндә хатын-кызлар һәм ир-атлар өчен аерым киенү-чишенү бүлмәләре бар. Анда душлар, сауналар һәм ял итү урыннары булачак. Аннан соң комплексның уртак территориясе башлана.
Комплексның ике катында бар һәм ресторан зонасы, аерым парлану өчен мунчалар һәм сауналар, душлар, кайнар һәм салкын сулы, тозлы купель урнашачак. Кунаклар массаж зонасыннан һәм дәвалау балчыгы белән процедуралар үткәрү бүлмәсеннән файдалана, балалар зонасында яки ачык балкон-мәйданчыкта ял итә алачак.
Җиһазларны эшләтеп җибәрүгә әзерлиләр
Комплекс өчен җиһазлар инде китерелгән һәм урнаштырыла. Вентиляция җиһазларын көйләү эшләре башкарылган. Якын арада белгечләр бассейн җиһазларын эшләтеп җибәрүгә керешәчәк. Хәзер аның калган өлешен китерү көтелә.
Алабуга термаларын бу ел ахырына кадәр ачу планлаштырыла. Башта комплексны иртәрәк эшләтеп җибәрү күздә тотылган иде, әмма җиһазларның бер өлеше чит илдән заказ белән кайтартыла һәм аларны китерү көтелгәннән озаграк вакыт алган. Барлык эшләр төгәлләнгәннән соң комплекс берьюлы 1000-1200 кешене кабул итә алачак.
Комплекс җитәкчелеге әйтүенчә, керү бәясен халык өчен уңайлы итәргә планлаштыралар. Тимур Басыров билгеләп үткәнчә, төп максат — кешеләр монда елына бер тапкыр түгел, ә даими рәвештә килә алырлык урын булдыру.
Нет комментариев