Бүген, 18 сентябрьдә, Алабугада һәм Алабуга районында сайлау участоклары ачылды. IX чакырылыш Дәүләт Думасы депутатларын сайлау 20 сентябрьгә кадәр дәвам итәчәк.
Алабуга районында тавыш бирү өчен 62 сайлау участогы эшли: 39ы — шәһәрдә, 23е — авыл җирлекләрендә. Алар иртәнге 8:00дән кичке 20:00гә кадәр ачык. Сайлаучылар исемлегенә 60 794 кеше кертелгән. Җиде авыл җирлегендә федераль сайлаулар белән беррәттән муниципаль берәмлекләрнең вәкиллекле органнары депутатларын өстәмә сайлау да уза.
Сайлаулар башланыр алдыннан участок комиссияләре әзерлек эшләрен төгәлләгән. 1407нче участок комиссиясе рәисе Гөлшат Ибраһимова сөйләгәнчә, комиссия бюллетеньнәрне алган, сайлаучылар исемлеген әзерләгән, ә комиссия әгъзалары үз урыннарында эшли. Әлеге участок Нечаев урамындагы йортларда, Кирпеч заводы территориясендә, «Жемчужина» һәм «Южный парк» торак массивларында яшәүчеләргә хезмәт күрсәтә.
Участокларның берсендә беренчеләрдән булып Реваль Ефимов тавыш бирде. Ул сайлауларда һәрвакыт катнашырга тырыша. Аның сүзләренчә, балачактан ук тавыш бирү көненең әти-әнисе өчен аерым вакыйга булуын хәтерли: өлкәннәр матур итеп киенеп участокка бара, ә балаларга тәм-томнар сатып алалар. Бүген ул сайлауда катнашуны үзенең гражданлык позициясен белдерү мөмкинлеге дип саный.
Алабугада сайлаучыларга ике бюллетень бирелә: бермандатлы сайлау округы һәм федераль партия исемлеге буенча. Участокка җитди сәбәп аркасында килә алмаучылар өчен өйдә тавыш бирү мөмкинлеге каралган. Моның өчен участок комиссиясенә 20 сентябрьдә 14:00гә кадәр мөрәҗәгать итәргә кирәк.
Сайлаулар көннәрендә иминлеккә аерым игътибар бирелә. Алабуга районы участокларында видеокүзәтү, яшеренү урыннары һәм куркынычсыз урыннар каралган. Татарстан Үзәк сайлау комиссиясе рәисе Андрей Кондратьев хәбәр иткәнчә, пилотсыз очу аппаратлары һөҗүме яки ракета һөҗүме куркынычы туганда, участокларның эше вакытлыча туктатылачак. Әгәр куркыныч участоклар ачылганчы барлыкка килсә, тавыш бирү «куркыныч бетте» сигналы игълан ителгәннән соң башланачак.
Нет комментариев