Татьяна Колчина: мәдәният һәм мәгариф өлкәсендә 43 ел

Балачак шөгыленнән – профессиягә

Татьяна Павловна 1965 елда Алабуга районының Югары Шүрнәк авылында туа, әмма күп еллардан бирле Иске Куклюкта яши. 2018 елдан бирле ул авыл мәдәният йортын һәм «Марийские зори» ансамблен җитәкли.

— Мин әнием һәм әбием җырларын тыңлап үстем, пластинкалар тыңларга ярата идем, — дип сөйли ул үзе турында. — Ә өйгә телевизор алгач, балет һәм биючеләр чыгышларын кызыксынып карый башладым. Үзем дә кечкенәдән җырларга, биергә яраттым, авыл клубындагы концертларда һәрвакыт катнаштым. Шуңа күрә сигезьеллык авыл мәктәбен тәмамлагач, Татар республика мәдәни-агарту училищесына укырга кердем. «Үзешчән бию коллективының сәнгать җитәкчесе» белгечлеген алдым.

Авыл мәктәбендә эшләгән еллары

Укуын тәмамлап туган ягына кайткач, Татьяна өч ел авыл мәдәният йортында белгечлеге буенча эшли. Аннары Олы Шүрнәк мәктәбе директоры аңа пионервожатый һәм җыр укытучысы вазифаларын тәкъдим итә. Шунда ул булачак ире белән таныша, егет ул вакытта хезмәт укытучысы булып эшли.
Яшь гаилә Иске Куклюкка күченеп килә, Татьяна авыл мәктәбендә эшләвен дәвам итә. 2001 елда Алабуга дәүләт педагогика институтын тәмамлый һәм тәрбия эшләре буенча директор урынбасары вазифасына керешә. Шул ук вакытта рус теле, әдәбияты һәм музыка дәресләрен дә алып бара.

— Педагогика минем өчен очраклы һөнәр түгел: әниемнең өч сеңлесе дә укытучы булып эшләде. Коллективыбыз да бик тату булды, барлык бәйрәмнәрне укучыларыбыз белән бергә үткәрдек. Төрле тематик атналар да оештыра идек, балалар аларны бик яратты. Үзләре рәсемнәр ясый, шул рәсемнәр буенча сәхнә күренешләре әзерли. Иремне Чехов итеп киендергәннәре хәтердә калган — шулкадәр охшаган иде!

2018 елда Татьяна Колчина Иске Куклюк мәдәният йорты һәм «Марийские зори» ансамбле җитәкчесе була. Аның җитәкчелегендә коллектив район, республика һәм төбәкара дәрәҗәдәге зур этнографик фестивальләрдә даими катнаша һәм лауреат исемнәрен яулый. Ансамбль «Балкыш» үзешчән башкаручылар республика фестиваль-конкурсында да берничә тапкыр лауреат исеменә лаек була.

Татьяна Колчина ансамбле белән Иске Куклюк һәм Олы Шүрнәк авыл җирлекләрендә «Авыл хатын-кызлары көне» концерт программаларын тәкъдим итәргә планлаштыра. Татьяна Павловнага яңа иҗади уңышлар һәм сүрелмәс энергия телибез!