Күзәтү астында: Алабугада тарихи биналарны ничек саклыйлар

Бу юлы Казан урамындагы 50а һәм 25а йортларына игътибар иттеләр. Казан урамындагы 50а йортының милекчесе сүзләренчә, хәзер бина буш тора һәм сатуга куелган, әмма хуҗалары аның торышын күзәтеп тора.

Ә менә икенче объектның тарихы бөтенләй башка. Руслан Газизов бинага 2006 елдан бирле хуҗа.

— Мин аны сатып алганда, ул коточкыч хәлдә иде. Без тулысынча ремонт ясадык, түбәсен алыштырдык, торгыздык. Бинаны үзебезгә калдырабыз — ремонтлыйбыз һәм монда үз офисларыбызны ачабыз, — дип планнары белән уртаклашты милекче.

Ике йорт та региональ әһәмияттәге объект статусына ия. Алабуга дәүләт музей-ядкарьлегенең мәдәни мирас объектлары мониторингы бүлеге башлыгы Денис Кондрашин бу корылмаларның ни өчен уникаль булуын аңлатты:

— Бу гражданлык иҗтимагый архитектурасының ачык мисаллары. Монда сәүдәгәрләр кибетләре урнашкан булган. Фасадларның тышкы пластикасы сакланган, әмма биналар, һичшиксез, ремонтка мохтаҗ. Моннан тыш, саклау йөкләмәләрен яңадан төзү таләп ителә. Кайбер объектларда мондый документлар 80 нче елларда ук төзелгән. Биредә безнең 2007 һәм 2014 елгы документлар, әмма аларны һәр биш ел саен яңартырга кирәк. Документларда объектның эчтәлегенә карата барлык таләпләр язылган.

Денис Кондрашин ачыклаганча, 50а санлы йорт — сәүдәгәр Постников утары, Алабугадагы стационар сәүдәнең беренче үрнәкләренең берсе, анда товарны ел әйләнәсе фиксацияләнгән бәядән сатып алып булган. Икенче объект — сәүдәгәр Шабалин кибете.

Исегезгә төшерәбез, мондый тикшерүләр тарихи биналарның кайбер хуҗаларына аларны саклап тоту буенча дәгъвалар булу сәбәпле оештырылды. Татарстан Республикасы мәдәни мирас объектларын саклау комитеты мәгълүматлары буенча, районда шундый 17 объект бар.

Мәдәни мирас объектларының хосусый хуҗалары беренче чиратта саклау йөкләмәләрен төзергә һәм аларда билгеләнгән эшләрне җиде ел дәвамында башкарырга бурычлы. Әлеге таләпләрнең үтәлешен тикшереп тору дәвам итә.