Кечкенә алабугалылар һәм чаллылылар үзләрен кече кышкы Олимпиадада сынадылар

40нчы «Йолдызлык» балалар бакчасында «Кече кышкы Олимпия уеннары — 2026» өченче муниципаль конкурсы узды. Ул кышкы Олимпия спорт төрләренә: алкалы һәм туплы хоккейга, биатлонга, бобслейга багышланган иде.

Ярышлар башланыр алдыннан катнашучылар Олимпия уеннары символларына хөрмәт күрсәттеләр — бу факел һәм байрак. Россия һәм Татарстан байраклары, Олимпия боҗралары һәм Кар барсы белән матур чыгыштан соң яшь спортчыларны хөрмәтле кунаклар сәламләде.

Алабуга районы мәгариф идарәсенең мәктәпкәчә белем бирү буенча методисты Әлфинә Билалова балаларны, аларның әти-әниләрен һәм педагогларны спорт бәйрәме белән котлады һәм уңышлар, җиңүләр теләде.

«Август Алабуга» җәмгыяте генераль директоры Владимир Алин әйтте:

— Кәефегез яхшы, нәтиҗәләр яхшы булсын! Ура!

«Йолдызлык» балалар бакчасы мөдире Элла Алина салкын һава торышыннан курыкмыйча килгәннәре өчен барысына да рәхмәт белдерде.

— Барыгызны да сәламләвебезгә без бик шат. Мин ышанам: бүген беркем дә җиңелмәс. Чөнки сез барыгыз да иң кыюлар һәм көчлеләр, иң җитезләр!

Ярышларның максаты балалар һәм өлкәннәр арасында спортны һәм сәламәт яшәү рәвешен популярлаштыру. Анда Алабуга һәм Яр Чаллы балалар бакчаларында тәрбияләнүчеләр катнашты. Яшь спортчылар бик яхшы физик әзерлек, зирәклек һәм команда рухы күрсәттеләр, дипломнар һәм медальләр белән бүләкләнделәр.

Ольга Нәҗипова «Росинка» 24нче балалар бакчасында тәрбияләнүче кызы өчен җан атарга килгән:

— Бу кышкы уеннарда без беренче тапкыр катнашабыз. Мондый чараларны бик яратабыз, шуңа күрә һәрвакыт катнашырга тырышабыз. Бу кызыклы да, күңелле дә, без үзебезнең балалар бакчасына, төркемебезгә, тәрбиячеләребезгә ярдәм итәбез.

Анастасия Гулькова улы Кирилл Громов белән килгән, ул ярышлар нәтиҗәләре буенча 1 урын өчен диплом алды:

— Без Чаллыдан, 98 нче балалар бакчасыннан. Физкультура укытучысы безнең командага ярдәм итүне сорады, без ризалаштык һәм үкенмибез — монда шәп! Бездә дә спортка ярдәм итәргә тырышалар, әмма мондый уеннар үткәрмиләр.

49нчы балалар бакчасында сабыйлар футбол белән шөгыльләнәләр, йөзү буенча всеобучта катнашалар. «Йолдызлык» — Надежда Петрованың зур теннис мәктәбе программасына кертелгән беренче мәктәпкәчә учреждение.

— Элек мин кичләрен балалы гаиләләрнең түгәрәкләргә йөрүен күзәтә идем — бу барысы өчен дә кыен. Мөдир буларак минем беренче идеям шундый секцияләрне туп-туры безнең бакчада булдыру иде. 

Без балаларыбыз сәламәт, нык, тырыш, спорт ягыннан амбициоз булып үссен өчен кулдан килгәннең барысын да эшлибез. Безнең районда балаларыбыз чыннан да спорт мохитендә үссен өчен уникаль мөмкинлекләр тудырылган. Мин шәһәр җитәкчелегенә, «Махеев» хәйрия фондына һәм Леонид Барышевка, "Август-Алабуга«га коллективка ярдәм итүләре өчен рәхмәтлемен. Һәм әлбәттә, «Олимп» мәктәбенә һәм «Вызов» клубына ярдәмнәре өчен рәхмәт, — ди Элла Алина. 

Сүз уңаеннан, «Махеев» хәйрия фонды «Йолдыздык» өчен 16 комплект балалар чаңгысы һәм 2 комплект өлкәннәр өчен сатып алган. Башка балалар бакчалары һәм мәктәпләр өчен дә шундый ук сатып алулар башкарыла — районны чаңгы буенча всеобучка әзерлиләр.

— Бездә инде бөтен көчкә тренировкалар бара, — дип планнары белән уртаклаша Элла Алина. — Без «Россия чаңгы юллары» Бөтенроссия массакүләм чаңгы ярышлары кысаларында «Татарстан чаңгы юллары» нда катнашырга гына түгел, ә моны югары дәрәҗәдә эшләргә телибез.