Казан галимнәре Алабуга һәм Менделеев районнарының борынгы кабер ташларын бер китапка туплады

Яңа хезмәт төбәк тарихында бүгенге көнгә кадәр сакланган, гарәп графикасы белән язылган эпиграфика истәлекләрен өйрәнүгә һәм аларны фән дөньясына танытуга багышланган. Нәшер ителгән китапта борынгы кабер ташларының фоторәсемнәре, алардагы текстларның төп нөсхәсе һәм хәзерге татар теленә тәрҗемәләре урын алган. Ул галимнәр, дин һәм тарих белгечләре өчен генә түгел, үз тамырларын барлаучы киң катлам укучылар өчен дә чыгарылган.

Игътибарга лаек, китапның нигезендә моннан ике дистә ел элек оештырылган фәнни экспедицияләр җыйган уникаль материаллар ята. Басма Алабуга дәүләт тарихи-архитектура һәм сәнгать музей-тыюлыгының турыдан-туры ярдәме белән яктылык күрде. Аның авторлары — татар язма мирасы һәм эпиграфика өлкәсендә танылган белгечләр Раиф Мәрданов һәм Ирек Һадиев.

Тикшеренүләр барышында авторлар бик зур күләмле эш башкарган:

• Алабуга районының 10 авылында 428 кабер ташы өйрәнелгән;
• Менделеев районының 13 торак пунктында 172 ташъязма теркәлгән.

Китапны тәкъдим итү чарасында авторларның берсе Ирек Һадиев кызыклы бер фактка басым ясады. Аның сүзләренчә, Алабуга төбәгендә татар авыллары саны зур булмаса да, табылган һәм өйрәнелгән ташъязма истәлекләрнең саны буенча бу район республикада алдынгы позицияне биләп тора.