Кар 2,5 тапкыр күбрәк: МЧС Алабугада язгы ташу куркынычын бәяләде

Әлеге мәсьәлә буенча 2 мартта башкарма комитет, коммуналь һәм юл хезмәтләре, МЧС белгечләре һәм авыл җирлекләре башлыклары катнашында узган киңәшмәдә фикер алыштылар. Киңәшмәне район башлыгы үткәрде. Рөстәм Нуриев шәһәр планеркасында да вәзгыятьнең җитдилеген ассызыклады.

Беренчел фаразлар буенча, һава температурасы мартның икенче декадасында күтәрелә башлаячак. Татарстан Республикасы Гадәттән тыш хәлләр министрлыгының Алабуга районы буенча бүлеге башлыгы Сергей Бахматов билгеләп үткәнчә, язгы ташуның көченә кар күләме әллә ни йогынты ясамый — монда җылыну тизлеге, туфракның торышы һәм боз шартлары төп әһәмияткә ия.

Кар акрынлап эресә, җылыну һәм төнге салкыннар чиратлашып барса, су да акрынлап китәчәк. Бу шәһәр инфраструктурасына артык йөкләнеш ихтималын киметәчәк, ләкин шәһәрнең түбән участокларында урыны белән су басу куркынычы сакланачак. Ә менә көннәр тиз җылынып, яңгырлар яуган очракта, язгы ташуның зур булуы ихтималы бар. Туң туфракка су сеңми диярлек һәм ул тиз генә яңгыр системасына һәм сулыкларга агып төшә.

Хәзер коммуналь хезмәтләр шәһәрдә һәм районда әзерлек эшләрен алып бара. Болар — суүткәргеч торбаларны, яңгыр канализацияләрен, күперләрнең дренаж системаларын кардан һәм чүптән чистарту, ябу арматурасын инвентаризацияләү. Шулай ук елга үзәннәрен һәм чокырларны тикшерү һәм чистарту планлаштырыла.

Предприятие һәм оешма җитәкчеләренә мөрәҗәгать итеп, Сергей Бахматов бина түбәләрендәге кар-бозны төшерергә, нигезләрне кимендә метр киңлектә кардан чистартырга, ведомство буйсынуындагы территорияләрдә булган улакларны, су үткәргеч торбаларны, канауларны һәм табигый су агызгычларны вакытында боздан һәм кардан чистарту, су суырту техникасының төзеклеген һәм әзерлеген тикшерү кирәклеген ассызыклады.
Шулай ук җитәкче шәһәрнең тарихи өлешендә яшәүчеләрне Нефтьчеләр проспектындагы, Казан, Мәскәү, Тойма, Шишкин урамнарындагы йортлары каршындагы тротуарларны һәм табигый су улакларын кардан һәм боздан чистартырга өндәде.

Сергей Бахматов искә төшергәнчә, ел саен 20 марттан соң Түбән Кама ГЭСыннан су агызуның артуы көтелә. Шуңа бәйле рәвештә плотинадан Алабугага кадәр бозда булу тыела, чөнки бозның хәрәкәтләнүе һәм ватылуы ихтимал. Бу беренче чиратта Кама буенда причал янында җыелучы балыкчыларга кагыла.

Кар эрү чорында МЧС киңәш итә:
— реклама щитларыннан, юл билгеләреннән һәм электр линияләреннән ераграк торыгыз;
— түбәләрдәге кар һәм боз сөңгеләренә игътибар итегез, куркыныч урыннарны урап узыгыз;
— бозлавык вакытында акрын һәм сак йөрегез;
— шумый торган уңайлы аяк киеме сайлагыз;
— юл аркылы чыкканда игътибарлы булыгыз;
— автомобиль йөрткәндә тизлек режимын һәм дистанцияне саклагыз, кискен маневрлардан сакланыгыз;
— һава торышы начар булганда өйдә калыгыз.