1 октябрьдән чираттагы хәрби чакырылыш кампаниясе башлана. Ул 31 декабрьгә кадәр дәвам итәчәк.
Хәрби хезмәткә чакыру чаралары хәзер ел әйләнәсе уза
Төп яңалык — армиягә чакыру чараларын ел дәвамында үткәрү тәртибе. Хәзер хәрби комиссариатлар яшьләрне медицина тикшерүенә һәм чакырылыш комиссиясе утырышларына елның теләсә кайсы вакытында чакыра ала. Әмма яңа хәрбиләрне хезмәт урынына җибәрү элеккечә язгы һәм көзге чорларда гына башкарыла.
2026 елда хәрби хезмәткә запаста булмаган, гамәлдәге кичектерүе булмаган һәм сәламәтлеге буенча хезмәткә яраклы дип танылган 18 яшьтән 30 яшькә кадәрге ир-атлар чакырыла. Хезмәт итү вакыты үзгәрми — 12 ай.
Кичектерүне кем алырга хокуклы
Хәрби хезмәткә чакырылышны кичектерү өчен законда берничә нигез каралган:
- аккредитацияләнгән уку йортларында көндезге бүлектә уку;
- сәламәтлек торышы буенча вакытлыча хезмәткә яраксыз булу («Г» категориясе);
- гаилә шартлары (мәсәлән, ике һәм аннан да күбрәк бала, инвалид бала, туганын карау);
- профильле югары белемгә ия белгечләр өчен аккредитацияләнгән IT-компанияләрдә эшләү;
- дәүләт хезмәте һәм депутатлык эшчәнлеге.
2026 елдан электрон повестка чакырылучыларга хәбәр итүнең төп чарасына әверелә. Повестка реестрда яки «Дәүләт хезмәтләре» порталындагы шәхси кабинетта урнаштырылган мизгелдән тапшырылган дип санала. Чакырылучы повестка барлыкка килгәннән соң 30 көн эчендә хәрби комиссариатка килергә тиеш. Әгәр дә килмәүнең нигезле сәбәбе булмаса, килү вакыты чыкканнан соң 20 көн узгач, автомат рәвештә вакытлыча чикләү чаралары кертелә.
Алар арасында Россиядән читкә чыгуны, транспорт чарасы белән идарә итүне, шәхси эшмәкәр һәм үзмәшгуль буларак теркәлүне тыю, күчемсез милек белән килешүләр төзүне туктатып тору, кредит һәм заем алуны чикләү, машина йөртү таныклыгын рәсмиләштерү яки озайту мөмкинлеген чикләү, милеккә хокукларны дәүләт теркәвен туктатып тору бар.
Килмәгән өчен штраф каралган
Моннан тыш, повестка буенча килмәгән өчен штраф күләме 10 меңнән 30 мең сумга кадәр тәшкил итә. Яшәү урыны үзгәрүе, илдән озак вакытка чыгу яки хәрби исәп документларын югалту турында хәбәр итмәгән өчен дә аерым штрафлар каралган.
Истә тотыгыз: электрон повестканы ачмасагыз да, «Дәүләт хезмәтләре» порталындагы шәхси кабинетыгызны бетергән очракта да ул тапшырылган дип санала. Чикләүләр хәрби комиссариатка килгәнгә һәм килмәү сәбәпләре каралганга кадәр гамәлдә була. Барлык чикләүләр һәм штрафлар автомат рәвештә кертелә.
2026 елгы көзге чакырылыш вакытында үзгәрешсез калган мөһим кагыйдә: чакырылучыларны махсус хәрби операция үткәрү зонасына җибәрмиләр. Хәрби хәрәкәтләрдә катнашу бары тик контракт нигезендә һәм үз теләге белән генә мөмкин.
Нет комментариев