Бер атна эчендә Татарстанда спиртлы эчемлекләрдән тугыз кеше агуланган

Татарстанда 22–28 июнь көннәрендә алкоголь һәм спиртлы эчемлекләр белән агулануның тугыз очрагы теркәлгән. Бу хакта Роспотребнадзорның ТР буенча идарәсе матбугат хезмәте хәбәр итә.

Күрсәтелгән чорда барлыгы химик матдәләрдән кискен агулануның 58 очрагы теркәлгән. Шул ук вакытта ир-атлар күбрәк зыян күргән — 57%, ә хатын-кызлар өлеше 43% тәшкил итә.

Ведомствода өстәп белдерүләренчә, очраклы агулануларның күпчелеге спиртлы эчемлекләр куллану белән бәйле (39,2%). Башка очраклар даруларны ялгыш йоту (25%), агулы еланнар чагу (17,8%), төрле матдәләрне очраклы рәвештә кабул итү (10,7%) һәм башка сәбәпләр (7,3%) белән аңлатыла.