Алабугада төнлә урамда йөргән бала өчен әти-әнисе җавап бирә

Алабуга районында балигъ булмаганнарның ата-аналарына һәм законлы вәкилләренә җәйге чорда балалар куркынычсызлыгы кагыйдәләре турында искә төшерделәр.

Татарстан Республикасының 71-ЗРТ номерлы Законы нигезендә, 1 июньнән 31 августка кадәр балигъ булмаганнарга ата-аналары яисә законлы вәкилләре озатуыннан башка төнге сәгать 23:00дән иртәнге 06:00гә кадәр урамда булу тыела.

Җәйге айларда Алабуга районында төнге профилактик рейдлар уза. Балигъ булмаганнарның эшләре һәм аларның хокукларын саклау комиссиясе, профилактика хезмәтләре белән берлектә, закон таләпләренең үтәлешен күзәтеп бара.

Ата-аналарга балалар белән алдан ук сөйләшергә, аларга кагыйдәләрне аңлатырга һәм мондый чикләүләрнең аларның куркынычсызлыгы өчен ни дәрәҗәдә мөһим булуын сөйләргә киңәш ителә. Шулай ук өлкәннәр йөрү вакытын контрольдә тотарга һәм баланың кичен кайда булуын белергә тиеш.

Комиссиядә искәртеп үтүләренчә, 120-ФЗ номерлы Федераль закон буенча ата-аналарга балаларны тәрбияләү һәм карау өчен җаваплылык йөкләнгән. Ата-ана бурычларын үтәмәгән өчен РФ Административ хокук бозулар кодексының (КоАП РФ) 5.35 маддәсе буенча административ җаваплылык каралган.

Белгечләр ата-аналарны балаларга, аеруча җәйге каникуллар чорында, үсмерләр урамда ешрак вакыт уздырганда һәм өйгә гадәттәгедән соңрак кайтканда, игътибарлырак булырга чакыра.