Алабугада татар телен һәм гореф-гадәтләрен үстерү турында фикер алыштылар

Очрашуда катнашучыларны район башлыгы исеменнән башкарма комитет җитәкчесенең социаль мәсьәләләр буенча урынбасары Елена Мерзон сәламләде. Ул бүген Алабуга районында алып барыла торган эшләр турында сөйләде.

— Район башлыгы инициативасы белән «Сәүдәгәрләр шәһәрчеге» оешмасы төзелде, ул Алабуганың тарихи өлешен үстерү белән шөгыльләнәчәк. Бездә яхшы тәҗрибә тупланган, һәм бу тәҗрибә туристларны җәлеп итүгә комплекслы эшләсен өчен әлеге юнәлешне көчәйтергә карар кылынды, − дип аңлатты Елена Ефимовна.

Ул шулай ук эшмәкәрлеккә ярдәм чараларына тукталды. Алар арасында — мәдәни мирас объектларын 1 сумга сату һәм социаль әһәмияткә ия ихтыяҗлар өчен урыннарга ташламалы аренда түләүләре турында әйтергә була.

Тел, гореф-гадәтләр һәм үзара хөрмәт

Бүген татарлар район халкының 42 проценттан артыгын тәшкил итә. Татар авыллары: Морт, Иске Юраш, Илмәт һәм Дөм-Дөм. Барлык милләтләр дә биредә үзара аңлашу һәм хөрмәт атмосферасында яши, бәйрәмнәрне бергә билгеләп үтәләр, ә шәһәрдә рәсми чаралар ике телдә − рус һәм татар телләрендә уза.

Бөтендөнья татар конгрессының Алабуга бүлекчәсе җитәкчесе Рамилә Әхмәтова сөйләгәнчә, «Ак калфак» хатын-кызлар берләшмәсе аерым роль уйный. Җирле бүлекчә җитәкчесе Эльмира Әхмәтҗанова оешма каршында үзешчән татар театры оештырган. Катнашучылар МХО зонасындагы сугышчыларга даими рәвештә булышалар: чәкчәк, токмач ясап озаталар, ә күптән түгел хәрби хезмәткәрнең гаиләсенә фатир ремонтлауда булышканнар.

Телне үстерү буенча Тәҗрия Җәләева җитәкчелегендәге «Чулман» әдәби-музыкаль берләшмәсе актив эш алып бара.

− Без барлык милләтләр белән дус яшибез, — диде Рамилә Әхмәтова. — Мәсәлән, Танайкада суган фестивалендә Морт халкы кунакларны коймак һәм мәтрүшкә чәе белән сыйлады, ә Илмәттән килгән кунаклар татар җырларын җырлады. Мәдәниятләр үрелеп, бер-берсен баетып яши.

Барлык дәрәҗәләрдә ярдәм

Рамилә Әхмәтова Алабуга районы башлыгы Рөстәм Нуриевка, башкарма комитет җитәкчесе Эльмира Әхмәдиевага һәм аның урынбасары Елена Мерзонга тел һәм мәдәнияткә ярдәм иткәннәре өчен рәхмәт белдерде.

— Без Яулык һәм Кыяр бәйрәмнәрен, Суган фестивален дә бергәләп билгеләп үтәбез. Болар барысы да район башлыгы гранты ярдәмендә башкарыла. Аның инициативасы белән авыл җирлекләрендә милли мәдәниятне торгызу өчен бәйрәмнәр үткәрүгә акча бүлеп бирелә, — дип өстәде Елена Мерзон.

Мирасны үстерүгә Алабуга дәүләт музей-ядкарьлеге зур өлеш кертә. Аның проектлары күптән инде республикадан читкә чыкты.

Очрашу азагында милләтнең мәдәни кодын саклауга көн саен өлеш кертүче алабугалы хатын-кызларны бүләкләделәр. Аннары кунаклар шәһәр буйлап экскурсиягә киттеләр.