Алабугада шәһәр планеркасында бүләкләү тантанасы үтте

Район башлыгы Рөстәм Нуриев һәм «Махеев» хәйрия фондының башкарма директоры Илдар Галиев алдынгы хезмәткәрләргә, спортчыларга һәм күптән түгел үткәрелгән чараларда катнашучыларга мактау грамоталары, рәхмәт хатлары һәм дипломнар тапшырдылар.

Алабуга муниципаль районы башлыгы урынбасары Александр Косов «Татарстан Республикасы Муниципаль берәмлекләре советы» Ассоциациясенең Мактау грамотасына лаек булды. Әлеге бүләк җирле үзидарә органнары эшчәнлегенең нәтиҗәлелеген күтәрүдәге казанышлары һәм күпьеллык намуслы хезмәте өчен бирелде.

Гражданлык хәле актларын теркәү өлкәсендә күпьеллык намуслы хезмәте өчен Татарстан Республикасы Дәүләт Советы Рәисенең Рәхмәт хаты ЗАГС бүлеге башлыгы урынбасары Елена Семеновага тапшырылды.

Территориаль сайлау комиссиясе әгъзасы Олеся Волкова сайлау системасын үстерүгә керткән зур өлеше өчен Татарстан Республикасы Үзәк сайлау комиссиясенең Мактау грамотасы белән бүләкләнде.

Спортчыларга аерым рәхмәт сүзләре әйтелде. «Алабуга-Эссен» мини-футбол клубы (тренеры Альберт Төхвәтуллин) 2026 елда ир-атлар командалары арасында футзал буенча Татарстан чемпионатында җиңгәне өчен район башлыгының мактау грамотасын алды. Бүләкне команда капитаны Динар Гаязовка тапшырдылар. Шунысы игътибарга лаек, клуб 80% ка «Олимп» спорт мәктәбендә тәрбияләнүчеләр белән комплектланган.

Район башлыгының мактау грамоталарын Бердәм дежур диспетчерлык хезмәте хезмәткәрләренә дә тапшырдылар. ЕДДС директоры Валерия Юшкова һәм оператив дежурный Сәлимә Кодес һөнәри бәйрәмнәре уңаеннан күпьеллык намуслы хезмәтләре өчен билгеләп үтелделәр.

«Махеев» хәйрия фондының башкарма директоры Илдар Галиев «Күңелле стартлар» муниципаль уены кысаларында чаңгы ярышларында җиңүчеләргә 50 мең сумлык акчалата сертификатлар тапшырды. Бүләкләрне командаларның капитаннары: Кира Кузьмина (6 нчы мәктәп), Богдан Иванов (8 нче мәктәп), Алим Федоров (Костенеево мәктәбе), Матвей Лаптов («Алабуга-Политех» көллияте) алды.