Алабугада «Пир в мир» фестивалендә чобан-говурма әзерләячәкләр

Алабугада шәһәр чараларының җәйге сезоны дәвам итә. Бу шимбәдә, 13 июньдә, Ленин мәйданында «Пир в мир» гастрономия фестивале узачак. Программа 17:00 дә башлана.

Бу юлы фестиваль кунакларын Көнчыгыш ризыгы булган чобан-говурма белән таныштырачаклар. Яшелчәләр һәм тәмләткечләр кушып ясалган итле ризыкны тамашачылар күз алдында әзерлиләр. Программаның кулинария өлешен «Мәхәббәт» («Махаббат») ресторанының шеф-повары тәкъдим итәчәк.

Гастрономия программасыннан тыш, алабугалыларны һәм шәһәр кунакларын «Йолдызлык» мәдәни үсеш үзәге коллективы әзерләгән концерт көтә. Шулай ук мәйданда җирле осталарның кулдан ясалган сувенирлары тәкъдим ителәчәк.

Оештыручылар халыкны шимбә кичен гаилә белән үткәрергә, яңа ризыктан авыз итәргә, музыка тыңларга һәм Алабуга осталарына ярдәм итәргә чакыра. 

0+.