Алабугада нәниләр өчен «Йолдызлы җәй» беренче татар лагерен ябу тантанасы үтте

Бүген аны ачылуы кебек үк якты һәм күңелле итеп — фестиваль, җырлар, биюләр һәм бик күп рәхмәтле елмаюлар белән яптылар. Нәниләр нәрсәгә өйрәнделәр һәм проектны тормышка ашырырга кем ярдәм итте — безнең репортажда.

Бүген, 26 июньдә, 40 нчы «Йолдызлык» балалар бакчасында нәниләр өчен оештырылган «Йолдызлы җәй» беренче татар лагере эшенә нокта куелды. Искәртеп үтик, проект нәкъ бер ай элек эшли башлады һәм ике сменада балаларны кабул итте. Бу вакыт эчендә 90 бала, 165 ата-ана һәм 27 педагог милли мәдәнияткә һәм телгә багышланган зур мавыктыргыч сәяхәтнең бер өлеше булды.

Сменаның ябылуы татар сәнгате фестиваленә әверелде. Бу эчтәлекле ай эчендә балаларның нәрсәгә өйрәнгәннәрен күрер өчен бирегә ата-аналар һәм мактаулы кунаклар килде.

Бәйрәмне нәниләр үзләре башлап җибәрде — алар татар телендә шигырьләр укыдылар, ә аннары зал бердәм рәвештә «Туган тел» җырын башкарды. Туган телне кадерләгән һәркем өчен рәсми булмаган гимнга әверелгән бу җыр балаларны да, өлкәннәрне дә берләштерде.

Балалар бакчасы мөдире Элла Алина бу эшкә өлеш керткән һәркемгә рәхмәт белдерде һәм лагерь программасының бик бай булуын билгеләп үтте: биредә Габдулла Тукай юбилеена багышланган татар әкиятләре көне дә, мәдәният колледжы ярдәмендә милли музыка белән танышу да, түбәтәйләр һәм изү бизәкләре ясау буенча мастер-класслар, хәтта үз Сабантуйлары да узган. Балалар милли сыйлар әзерләргә өйрәнгән, көрәштә үз көчләрен сынап караган һәм үз гореф-гадәтләре белән уртаклашкан татар гаиләләре белән очрашкан.

Элла Анатольевна телне саклауга игътибар иткәннәре өчен Татарстан Рәисе Рөстәм Миннихановка, шулай ук Татарстан Республикасы Дәүләт Советы рәисе вазыйфаларын башкаручы Марат Әхмәтовка аерым рәхмәт белдерде — республика җитәкчелеге ярдәме белән бакчада яңа җиһазлар һәм киләчәктәге бәйрәмнәр өчен урам сәхнәсе пәйда булган. Лагерьны оештырырга ярдәм иткәне өчен Алабуга районы башлыгы Рөстәм Нуриевка да рәхмәт сүзләре җиткерелде.

Район башлыгы Рөстәм Нуриев, җыелучылар алдында чыгыш ясап, проект турында җылы фикерләрен белдерде. Ул бу балалар бакчасында һәрвакыт теләп кунак булуын һәм мондый башлангычларны тарихны һәм мәдәниятне саклау өчен аеруча мөһим булуын билгеләп үтте. Ул Элла һәм Владимир Алиннарның, үзләре Татарстанда туып-үсмәсәләр дә, шәһәрне үстерүгә бөтен күңелләрен бирүләренә аерым игътибар итте һәм бу эш барлык белем бирү учреждениеләре өчен үрнәк булыр дигән ышаныч белдерде. Сүзенең азагында ул бакча коллективына алдагы эшләрендә ярдәм булачак сертификат тапшырды.

Котлауларга ТР Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Зарипов та кушылды. Балаларга истәлекле бүләкләр тапшырылды, ә нәниләр үз чиратларында кунакларга үз куллары белән ясаган сувенирларны бүләк иттеләр.

Ата-аналар исеменнән Эльвира Сибагатова чыгыш ясады. Бәйрәм концерт белән дәвам итте — сәхнәдә тәрбиячеләр, кызлар-малайлар да бик теләп җырлады-биеде.

Оныгы Таня шушы балалар бакчасына йөрүче әбиләрнең берсе — Алевтина Потапова үзенең таң калуын яшермәде: аның сүзләренчә, музейга барулар да, кулинария мастер-класслары да, түбәтәйләр ясау да балалар өчен чын могҗизага әверелгән. Ул тәрбиячеләргә хезмәтләре өчен рәхмәт әйтте һәм барлык ата-аналарның да бик канәгать калуларын билгеләп үтте.