Алабугада «Кызыл канәфер» акциясе башланды: һәркем ветеранга ярдәм итә ала

Бүген бөтен Россия буенча еллык «Кызыл канәфер» хәйрия акциясенә старт бирелде. Алабугалылар да илебезне саклаган кешеләргә ярдәм итүгә үз өлешләрен кертә ала. 22 июньгә кадәр шәһәр халкының символ-билге сатып алу мөмкинлеге бар, ә җыелган барлык акчалар Бөек Ватан сугышы ветераннарына, сугыш балаларына һәм хәрби хәрәкәтләрдә катнашучыларга медицина ярдәме күрсәтүгә юнәлтеләчәк.

Бу акчаларга ишетү аппаратлары, протезлар һәм башка кирәкле җиһазлар сатып алына. Узган ел акция илнең 83 төбәген колачлады һәм 115 миллион сумнан артык акча җыйды. Татарстан җыелган акча күләме буенча өченче урынны алды.

Алабуга — Татарстанда лидер

Безнең шәһәрдә Илиза Чернышова җитәкчелегендәге «көмеш» волонтерлар аеруча аерылып тора. Алар акциядә дүртенче ел рәттән катнаша. Узган ел Алабуга республикада беренче урынны алды: иреклеләр 250 мең сум акча җыйдылар, аны «Буыннар хәтере» («Память поколений») хәйрия фондына тапшырдылар.

«Читтә калмаган һәркемгә рәхмәт»

Алабуга районы башлыгы урынбасары Александр Косов акциягә инде кушылган яки әле кушылырга җыенган һәркемгә рәхмәт белдерде.

— Җыелган барлык акчалар изге максатларга — ветераннар һәм махсус хәрби операциядә катнашучылар өчен тотылачак. Читтә калмаган һәркемгә рәхмәт, — дип мөрәҗәгать итте Алабуга халкына Александр Косов.

Акциягә теләге булган һәркем кушыла ала. «Кызыл канәфер» билгеләрен шәһәр урамнарында волонтерлардан сатып алырга мөмкин.