Алабугада йөзү буенча икенче спорт сыйныфы ачылды

8 нче мәктәптә йөзү буенча махсус класс ачылды

Мәктәптә йөзү буенча махсус спорт сыйныфы ачылды. Бишенче сыйныфта укучы 26 бала хәзер гади мәктәп программасын үзләштерү белән беррәттән, җитди рәвештә спорт белән шөгыльләнә дә алачак.

Алабугада йөзү буенча махсуслаштырылган сыйныфлар булдыру проекты инде беренче ел гына тормышка ашырылмый. Беренче мондый сыйныф 2025 елда инженер-технология лицеенда ачылган иде.

8нче мәктәптә инфраструктураны яңартуга муниципаль бюджеттан 10 миллион сумнан артык акча юнәлдерелгән. Бу акчалар уку һәм тренировкалар өчен заманча шартлар булдыруга тотылган: бассейн ваннасына һәм түшәм япмаларына капиталь ремонт ясалган.

Алабуга һәм Алабуга районының йөзү федерациясе дә проектка зур өлеш кертте. Вадим Махеев җитәкләгән бу оешма уку сыйныфын һәм спортчылар өчен ял бүлмәсен тулысынча төзекләндерүне, шулай ук бассейнда вентиляция системасын яңартуны финанслады.

Проект көчле спортчыларны әзерләүгә юнәлдерелгән

Хәзер балаларга туган шәһәрләреннән читкә китмичә, спорт белән җитди дәрәҗәдә шөгыльләнү мөмкинлеге бар. Ә икенче сыйныф укучылары йөзү буенча «Йөзәргә күмәк өйрәнү» курсын («Всеобуч») турыдан-туры мәктәптә уза алачак.

Алабуга районы башлыгы Рөстәм Нуриев шәһәрдә йөзүне үстерү программасының инде берничә ел эзлекле рәвештә тормышка ашырылуын билгеләп үтте. Вадим Махеев инициативасы белән 2021 елда башланган проект елдан-ел киңәя бара: «Йөзәргә күмәк өйрәнү» курсына яңа юнәлешләр һәм яшь спортчылар өчен мөмкинлекләр өстәлә. Әлеге проект уникаль, Россиядә һәм Татарстанда андый башка юк.

Рөстәм Нуриев сүзләренчә, программаны тормышка ашыру артында спортчыларны сайлап алу һәм әзерләү буенча зур эш тора. Район башлыгы сүзләренчә, проектның төп максаты — киләчәктә югары нәтиҗәләргә ирешерлек һәм Олимпия уеннарында алтын медальләр өчен көрәшерлек көчле команда булдыру. Олимпия биеклегенә юл озын булырга мөмкин, әмма куелган максатка ирешү мөмкин булачак, дип ышанычын белдерде ул.

Рөстәм Нуриев шулай ук Алабуга һәм Алабуга районы йөзү федерациясе президенты Вадим Махеевка проектны тормышка ашырудагы максатчанлыгы һәм җаваплы мөнәсәбәте өчен рәхмәт әйтте.

Вадим Махеев та куелган максатларның үзгәрешсез калуын билгеләп үтте. Ул яшь спортчыларның әти-әниләренә дә рәхмәтен җиткерде, чөнки балаларның уңышлары артында гаиләнең зур хезмәте тора.

Тренерлар һәм ата-аналар яшь йөзүчеләргә ярдәм итәргә әзер

Вадим Махеев та куелган максатларның үзгәрешсез калуын билгеләп үтте. Ул яшь спортчыларның әти-әниләренә дә рәхмәтен җиткерде, чөнки балаларның уңышлары артында гаиләнең зур хезмәте тора.

Яшь йөзүчеләрне әзерләүдә тренерларның дә роле зур. Алабуга һәм Алабуга районы Йөзү федерациясенең башкарма директоры, Россиянең атказанган тренеры Николай Бородин әйтүенчә, остазлар алдында югары дәрәҗәдәге спортчылар әзерләү генә түгел, балаларга гармонияле шәхес булып формалашырга ярдәм итү бурычы да тора.

Спорт сыйныфының ачылуы 8нче мәктәп өчен мөһим вакыйга. Мәктәп директоры вазифаларын башкаручы Наталья Маликова балаларга яңа коллективка тизрәк ияләшүләрен һәм югары нәтиҗәләргә бергәләп омтылуларын теләде. Яшь спортчыларның сыйныф җитәкчесе итеп Эдуард Краснов билгеләнде.

Күп гаиләләр өчен спорт сыйныфы яхшы мөмкинлек булды

Ата-аналар исеменнән тантанада Евгения Черкеева чыгыш ясады.

«Без бу сыйныфның бердәм рухлы коллектив булып оешуына, тәртипкә өйрәнүенә һәм бүген әйтелгән барлык теләк-өметләрне аклавына ышанабыз. Без, һичшиксез, чемпионатларда һәм Олимпия уеннарында нәтиҗәләргә ирешәчәкбез», — диде ул.

Күп кенә гаиләләр өчен спорт сыйныфына эләгү баланың сәләтен ачар өчен яхшы мөмкинлек.

Солтан Мөбарәкшин балачактан йөзү белән шөгыльләнә. Аның әнисе Гөлнара сөйләвенчә, башта малай параллель рәвештә футболга да йөргән, әмма тора-бара йөзү — төп кызыксыну юнәлешенә әверелгән.

Тәрбияләнүчеләрнең спорт хыяллары барлыкка килде инде

«Йөзәргә күмәк өйрәнү» («Всеобуч») турында дуслардан белдек. Бассейнга йөрү мөмкинлеге тугач, бик сөендек, чөнки бу сәламәтлек өчен бик файдалы. Улыбыз икенче сыйныфта ук шөгыльләнә башлады. Аңа ошады, ә йөзүдә уңышлары була башлагач, футболны калдырып, йөзүне сайлады. Барлык сайлап алу этапларын да уздык һәм шушы сыйныфка эләктек. Мондый мөмкинлектән файдаланырга кирәк, алга таба вакыт күрсәтер. Иң мөһиме — улыбыз бирегә теләп килде«, — дип сөйләде ул.

Спорт сыйныфына 5нче мәктәптән килгән Евгения Журавлева киләчәктә кем булырга теләвен хәзер үк белә. «Йөзү белән дүрт ел шөгыльләнәм. Миңа бик ошый. Бу сыйныфка эләгүемә шатмын. Киләчәктә йөзү буенча тренер булырга хыялланам», — диде Женя.

Яшь спортчыларның барысы да бер үк вакытта мәктәп укучылары да, «Кама» спорт мәктәбе тәрбияләнүчеләре дә. Спорт мәктәбе директоры Римма Дьяконова сөйләвенчә, балалар "Всеобуч«тан соң сайлап алуны узган, хәзер исә тренерлар алдында зур җаваплылык тора.

Йөзү белән балалар атнага алты көн шөгыльләнәчәк

«Киләчәктә ел саен мәктәпләр базасында шундый спорт сыйныфлары ачарга планлаштырабыз. Җаваплылык арта, әмма нәтиҗәләр дә яхшыра», — дип билгеләп үтте Римма Дьяконова.

Яшь спортчыларның көн тәртибе хәзер үк гади мәктәп укучыларыныкыннан аерыла. Алар бик иртә йокыдан торалар. Сәгать 6да беренче тренировкалары башлана, аннары — иртәнге аш һәм мәктәп дәресләре. Балалар атнага алты көн йөзү белән шөгыльләнә. Аерым көннәрдә тренировкалар ике тапкыр — иртән һәм дәресләрдән соң да уза.

Ял итү өчен махсус бүлмә һәм туклану каралган. Дәресләрдән соң балалар ял итә, ашый һәм өй эшләрен эшли ала. Шулай итеп, өйләренә икенче уку көненә әзерләнеп кайтачаклар.

Тантаналы линейкадан соң укучылар яңа сыйныфларына юнәлде. Анда аларны беренче тематик сыйныф сәгате һәм тагын бер сюрприз көтә иде — район башлыгы Рөстәм Нуриев һәм Вадим Махеев һәрбер балага туңдырма өләште.

Хәзер бишенче сыйныф укучылары алдында — уку, көндәлек тренировкалар, ярышлар һәм яңа җиңүләр. Аларның һәркайсының үз хыялы бар, әмма команда максаты бер — югары нәтиҗәләргә ирешү һәм киләчәктә иң дәрәҗәле спорт ярышларында Алабуга данын яклау.