Алабугада гомумшәһәр ифтар узды

Быел да изге Рамазан аенда Рөстәм Мидхәт улы Нуриев Хәлим хәзрәт Шәмсетдинов белән бергә районның дини активистларын, җирле оешма җитәкчеләрен һәм күрше районнарның имам-мөхтәсибләрен бер бәйрәм табыны артына җыйды, дип хәбәр итә Җәмигъ мәчетенең матбугат хезмәте.

Шулай ук бу бәйрәм ифтарына хөрмәтле кунаклар да чакырылган иде. Мәсәлән, Алабугадагы ифтарда Татарстан мөфтие урынбасары Равил хәзрәт Зөфәров һәм республика Рәисе аппараты вәкилләре дә катнашты. Равил хәзрәт район башлыгына мондый киң йөрәклелеге өчен рәхмәт әйтте һәм Татарстан мөфтие исеменнән дини активистларга рәхмәт хатлары тапшырды.

— Болар — районда рухи-әхлакый кыйммәтләрне саклау эшенә зур өлеш керткән һәм хәзер дә кертүче кешеләр, — диде Алабуга районы имам-мөхтәсибе Хәлим хәзрәт Шәмсетдинов. 

Хәлим хәзрәт ифтарга җыелучылар алдында сөйләгән вәгазендә барысына да изге Рамазан аенда уразаның олуг мәгънәсен искә төшерде.

— Иң мөһиме — сабырлык. Сабыр була белү — зур ихтыяр көче. Ураза кешене тәрбияли. Шулай итеп, мөэмин начар сүзләрдән, гамәлләрдән һәм эшләрдән тыела башлый, — дип аңлатты Хәлим хәзрәт Шамсутдинов.

Бөтен шәһәр ифтары вакытында «Ихсан» шәхси мәктәбенең эшчәнлеге турында фильм да күрсәтелде.