Алабуганың Җәмигъ мәчетендә шәкертләргә шәһадәтнамәләр тапшырылды

Өч ел дәвамында гыйлем эстәгән 28 шәкерткә тантаналы рәвештә укуны тәмамлау турында шәһадәтнамәләр тапшырылды. 

Тантаналы чарада укучылар, укытучылар һәм җәмәгатьчелек вәкилләре катнашты. Мөхтәсибәттә хәбәр итүләренчә, өч ел эчендә 22 хатын-кыз һәм 6 ир-ат дини гыйлемнәрне үзләштереп, үзләренең белем дәрәҗәләрен арттырдылар.

Нинди фәннәр үзләштерделәр?
Уку программасы бик бай һәм эчтәлекле булды. Шәкертләр түбәндәге дисциплиналарны өйрәнделәр:

• Коръән уку кагыйдәләре;

• Гарәп теле;

• Акыйда (иман нигезләре);

• Фикһ (ислам хокукы);

• Сира (Пәйгамбәребез Мөхәммәд (с. г. в.) тормыш юлы).

«Ихлас булуыгыз өчен рәхмәт»
Шәһадәтнамәләрне тапшыру вакытында Алабуга районы имам-мөхтәсибе Хәлим хәзрәт Шәмсетдинов үзенең котлау сүзләрен җиткерде:

«Без бүген мәдрәсәдә укыган иң нык, иң тырыш һәм максатка ирешүчән шәкертләребезгә шәһадәтнамә тапшырдык. Уку дәвамында алар дини фәннәрне өйрәнүдә үз ихласлыкларын һәм зур кызыксынуларын күрсәттеләр», — дип билгеләп үтте хәзрәт.

Шулай ук, мәдрәсәдәге хатын-кызлар төркемнәренең укытучысы Лилия ханым Фазлиева да үзенең изге теләкләрен җиткерде. Шәкертләр исә үз чиратында укытучыларына тирән рәхмәтләрен белдереп, уку елларында алган тәэсирләре белән уртаклаштылар.

Сез дә дини белем алырга телисезме?
Җәмигъ мәчете киләсе уку елына әзерлекне башлады. Мәдрәсәдә яңа төркемнәр сентябрь аеннан эшли башлаячак. Дин нигезләрен, Коръән укуны һәм ислам тарихын өйрәнергә теләүчеләрне мәчеткә чакырабыз!

Барлык сораулар буенча Җәмигъ мәчетенә мөрәҗәгать итә аласыз.