Алабуга урамнарын 20 меңнән артык чәчәк һәм 491 кашпо бизәячәк

Алдагы еллардагы кебек үк, шәһәрнең төрле нокталарында клумбалар һәм кашпо белән төрле декоратив конструкцияләр барлыкка киләчәк.

Берьеллык чәчәкләрне күпләп утырту Алабуганың баш архитекторы раслаган концепция буенча берьюлы берничә объектта алып барыла. Бу хакта Казанның «Гыйльметдиновлар» крестьян-фермер хуҗалыгы вәкиле Виталий Сорокин сөйләде.

Мәсәлән, шәһәргә керү юлында «Алабуга» стеласы янында кызыл пеларгония үсәчәк. Тынычлык проспекты һәм Яшьләр урамы киселешендәге зур чәчәклекне кызыл сальвия, ак пеларгония, яшел кохия һәм көмеш цинерария бизәячәк. Арысланнар бакчасы янына көмешсыман цинерария һәм кызыл сальвия утырталар. Үзәк базар янындагы «Павлин» клумбасында пеларгония, бәрхет чәчәкләр, кохия һәм цинерария барлыкка киләчәк.

Хәтер һәм Ленин мәйданнарында, «Чебурашка» паркында, Иван Шишкин һәйкәле янында, Тынычлык һәм Нефтьчеләр проспектларында, Төзүчеләр, Меңьеллык, Казан, Мәскәү һәм башка урамнарда чәчәклекләр яңартылачак. Петунияләр һәм башка төрле чәчәкләр күпер киртәләрендәге кашпода урнаштырылачак.

Чәчәкләр Казан хуҗалыгының үз питомнигында үстерелгән. КФХ тендерда җиңеп, үз көче белән яшелләндерү белән шөгыльләнә. 20 майдан соң, «Горзеленхоз» металл конструкцияләр урнаштыруга, аларны үсемлекләр белән тутыру башланачак.

Яшелләндерүчеләр шәһәр халкын урам чәчәкләренә сак карарга, аларны өзмәскә һәм шәхси ихтыяҗлар өчен казып чыгармаска чакыра.