Алабуга районында «көмеш» яшьтәге спортчылар спортның 6 төре буенча көч сынаша

«Өченче яшь» («Третий возраст») XVI Республика пенсионерлар спартакиадасының муниципаль этабы 55 яшьтән өлкәнрәк актив алабугалыларны җыйды. Ярышлар Россия Федерациясендә Халык бердәмлеге елына һәм Татарстан Республикасында Хәрби батырлык һәм хезмәт фидакарьлеге елына багышланган.

Ике көнлек ярышлар «Чемпион» физкультура-сәламәтләндерү комплексында һәм Җиңел атлетика манежында уза. Шәһәр һәм авыл ветераннары йөзү, өстәл теннисы, дартс, 1000 метрга йөгерү, ату һәм ГТО нормативлары буенча ярышалар.

Турнирны оештыручылар — Татарстан Республикасы һәм Алабуга районы җитәкчелеге, Россия Пенсионерлар берлегенең (РПБ) җирле бүлекчәсе һәм Алабуга муниципаль районының Ветераннар (пенсионерлар) советы. РПБ җирле бүлекчәсе рәисе билгеләп үткәнчә, ярышлар «Актив озын гомер» программасы кысаларында уздырыла, һәм муниципаль этап җиңүчеләре район исеменнән Казанга барачак.

— Спорт сәламәтлекне ныгытырга, актив тормыш рәвеше алып барырга ярдәм итә, ә ярышлар аралашу һәм яңа танышлар табу өчен тагын бер мөмкинлеккә әверелә.

Алабуга районы Ветераннар советы рәисе Геннадий Баганов искәртеп үткәнчә, Алабуга районы үзешчән сәнгать һәм халык иҗаты буенча республикада иң активлардан санала. Спортны ул киләсе баскыч дип атады.

Галина Сажина йөзү ярышларында катнашты. Аңа тиздән 78 яшь тула. Ул 40 ел дәвамында Алабуга үзәк район хастаханәсенең донорлык бүлегендә операция шәфкать туташы булып эшләгән. Шулай ук махсус хәрби операция башланганнан бирле маскировка челтәрләре үрү белән шөгыльләнә.

— Яшьтән үк чаңгы һәм йөзүне яратам. Хастаханәдә элек «Сәламәтлек» төркеме бар иде. Бассейн төзелү белән шунда йөри башладым — спорт залына да, суга да. Балаларымны да алып килә идем. Кыш саен чаңгыда шуам.

Николай Мальцев өстәл теннисы белән башта КамАЗ да эшләгәндә кызыксына башлаган.

— Мин 1949 елгы. Яшь чакта велосипед спорты, җиңел атлетика белән шөгыльләндем. Теннис белән башта һәвәскәр буларак уйнадым. Ләкин Алабугада мәктәп ачылу белән укырга килдем. Тренерыбыз Пупышев бик яхшы. Бер ел шөгыльләндем, хәзер көчемне профессионал буларак сынап карыйм.