Алабуга паркларында шәһәр милкен бозучыларга каршы ничек көрәшәләр

«Йорт янындагы бакча» скверы
«Домуправ-3» идарәче компаниясе карамагындагы Георгий паркы һәм «Йорт янындагы бакча» скверы җәй җитү белән вандаллар корбаны була. Идарәче компания директоры Екатерина Биктемирова бу хакта борчылуын белдерде. Вандаллар кулыннан бигрәк тә фонарьлар һәм кече архитектура формалары зыян күрә.

— Без видеокүзәтү системасын актив кулланабыз: тәртип бозучыларны күзәтәбез, аннары, шәхесләрен ачыклау өчен, мәктәпләргә җибәрәбез һәм соңыннан гына әти-әниләр белән элемтәгә керәбез. Әти-әниләргә зыян күргән милекне мөстәкыйль ремонтларга яки чыгымнарны капларга тәкъдим итәбез, — дип аңлата Екатерина Маратовна.

Әмма, барлык чараларга карамастан, инцидентлар дәвам итә. Бу атнада «Йорт янындагы бакча» скверында янә урам яктырткычын ваттылар. Видеокүзәтү камералары әлеге гамәлне башкарган малайны табарга мөмкинлек бирде — өстәвенә, видеода бала янәшәсендә хатын-кыз да бар. Видеода күренгәнчә, ул бу вакытта телефоннан сөйләшә һәм баланың яктырткычны ватуына игътибар итми. Ә бит шул рәвешле малай үзен дә куркыныч астына куя − зарарланган фонарьлардан ток сугарга мөмкин. Кызганыч, хатын-кыз моны аңламый иде булса кирәк.

Хәзер идарәче компания «сукыр зоналарны» тулысынча юкка чыгару һәм һәр хокук бозуны теркәү өчен скверда видеокамералар санын арттыруга гариза юллаган.

«Гуляй» һәм «Чебурашка» парклары
«Жилкомфортсервис» идарәче компаниясе җитәкчесе Римма Хәбибрахманова бу паркларны дүрт елдан артык күзәтә. Элек монда тәртип юк иде:

— Яктырткыч баганаларны, декоратив шарларны тартып чыгаралар, кечкенә су фонтаннарын ваталар, эскәмияләр янындагы такталарны каералар, чүп савытларын ваталар иде. Хәтта машиналар белән паркка кереп, газонны бозучылар да булды, — дип искә төшерә ул.

Уңай якка үзгәреш видеокүзәтү куллану һәм мәгариф идарәсе белән хезмәттәшлек корганнан соң сизелә башлаган, чөнки хокук бозучыларның күпчелеге — балалар. Системалы рәвештә баганаларны сүтеп торучы олы ир-атның да кем икәнен исәпләп чыгарганнар.

— Хокук бозучылар табылды һәм җәза алды: кемдер зыянны акчалата түләде, кемдер ватылуларны үз куллары белән төзәтте һәм хәтта бозылганнары урынына агачлар утыртты, — дип сөйли җитәкче. — Моннан тыш, шәһәрлеләр мондый гамәлләрнең нәтиҗәләре турында белсеннәр өчен, бу очраклар массакүләм мәгълүмат чараларында актив яктыртылды.

Комплекслы эш — камералар куллану, мәктәпләр һәм ата-аналар белән хезмәттәшлек, җәзаның котылгысыз булуы — нәтиҗә бирә. Паркларны үзләре теләп карап торучы халыкның актив позициясе шәһәр киңлекләренең чиста, матур һәм куркынычсыз булып калуына өмет уята.

Эксперт нәрсә ди?
Муниципаль контроль бүлеге башлыгы Жанна Сармакова милекне бозган өчен җаваплылык зыянның авырлыгына бәйле, дип аңлатты.

— Минималь зыян өчен хокук бозучыны административ җаваплылыкка тартачаклар. Ләкин сүз җитди зыян турында барганда, без материалларны Эчке эшләр министрлыгының милеккә зыян салу яки юк итү маддәсе буенча эш кузгату өчен бирәбез. Санкцияләр төрле булырга мөмкин: 5 яки 10 мең сум штраф һәм җимерелгән объектны мәҗбүри торгызудан алып җинаять җаваплылыгына кадәр, − дип аңлатты Жанна Сармакова.