«Халык инспекторы» кушымтасы машина йөртү культурасын үзгәртә

Ярты ел эчендә халык 5,6 миллион сум эшләгән. Кушымтаның файдасы һәм юлларның куркынычсызлыгы турында Алабуга районында юл хәрәкәте куркынычсызлыгы комиссиясе рәисе Эльмира Әхмәдиева сөйләде.

− «Халык инспекторы» кушымтасы нәрсәдән гыйбарәт һәм ул ни өчен уйлап чыгарылган?

− «Халык инспекторы» — 2014 елның ноябрендә эшли башлаган дәүләт мәгълүмат системасы. Ул хөкүмәт тарафыннан юл хәрәкәте һәм территорияне мобиль җайланмалар ярдәмендә хокук бозуларны теркәү өчен булдырылган. Төп максат — әлеге мәгълүматларны административ хокук бозулар турындагы эшләрне тикшергәндә куллану.

2024 елның 9 сентябрендә мобиль кушымтаның яңартылган версиясе чыкты. Төп яңалык — хокук бозуларны теркәү һәм каралган һәр гариза өчен аерым категорияләр буенча акчалата бүләк алу мөмкинлеге. Бу актив гражданнарны юл хәрәкәте иминлеген тәэмин итүгә җәлеп итүне һәм аларның җаваплылыгын арттыруны күздә тота.

− Кушымта, хокук бозучыларны җәзалаудан тыш, җәмгыятькә нинди файда китерә?

− Максат — җәза түгел, ә машина йөртү культурасын тәрбияләү. Яшь машина йөртүчеләр еш кына кагыйдәләрне бозалар: җәяүлеләрне хөрмәт итмиләр, кызыл утка хәрәкәт итәләр, тәрәзәдән чүп ташлыйлар, каршы полосага чыгалар. Җәзасызлык тәртип бозуларның кабатлануына һәм авыр нәтиҗәләргә китерә. Даими контроль дисциплиналаштыра: машина йөртүчеләр азрак кагыйдә боза, руль артында телефоннан сөйләшми. Татарстан Республикасы Цифрлы үсеш министры билгеләп үткәнчә, әлеге очракларны теркәп, кешеләр бер-берсен җәрәхәтләрдән һәм аварияләрдән саклыйлар.

− Нинди хокук бозуларны теркәгән өчен акча түлиләр?

− Хокук бозуны күргән битараф булмаган кеше кушымтага әлеге фактның фотосын яки видеосын урнаштыра. Әгәр ул раслана икән, әлеге кешегә штраф суммасының 25 проценты килә. Система эшләгән ярты ел эчендә республика халкы 5,6 миллион сум акча эшләгән. Мәсәлән, кулланучыларның берсе 226 гариза җибәргән һәм 275 000 сум алган, ә икенчесе − 260 000 сум. Бүләкләү иң зур куркыныч тудырган җиде категория өчен түләнә:

— светофорның тыючы сигналына хәрәкәт итү.
— каршы як полосага чыгу.
— җәяүлене үткәрмәү.
— руль артында телефон белән куллану.
— куркынычсызлык каешын эләктермәү.
— стоп-линияне кисү.
— тәрәзәдән чүп ташлау.

− Кем халык инспекторы була ала, яшь чикләүләре бармы?

− Кулланучыларның яше 17 дән 67 яшькә кадәр. Бу актив гражданлык позициясенең һәркемгә мөмкин булуын исбатлый. Сез пассив күзәтүче булудан туктыйсыз һәм шәһәрне уңайлырак һәм куркынычсызрак итә торган системаның бер өлеше буласыз.

− Гади кешегә кушымтадан файдалану никадәр катлаулы?

− Процесс максималь гади һәм юридик белемнәрне таләп итми. Төп функцияләр:
— геолокациянең автобилгеләнеше: система төшерү вакытын һәм урынын үзе теркәп бара, хаталарны булдырмый кала,
— аңлаешлы интерфейс: исемлектән хокук бозу категориясен сайлап алырга һәм фото яисә видео куярга кирәк,
— кушымтаны барлык популяр платформаларда табып була: RuStore, Google Play и App Store.

− Кулланучылар өчен нинди дә булса кисәтүләр бармы?

− Бар. Кушымта вәзгыятьне реаль яхшыртуга юнәлдерелгән. Хокук бозуларны җаваплы рәвештә теркәгез. 

Барлык яшәүчеләрне әлеге программаны гамәлгә куярга һәм аннан юл хәрәкәте культурасы өчен файдаланырга чакырам, барысына да − җәяүлеләргә дә, машина йөртүчеләргә дә хөрмәт булсын өчен.