Бехтерево авылында җиденче класс укучысы мотоциклы белән авариягә эләккән

Алабуга районында балигъ булмаган мотоцикл йөртүче катнашында юл-транспорт вакыйгасы булган. Бу хакта җирле Дәүләт автоинспекциясендә хәбәр иттеләр.

Авария 22 майда көндез Бехтерево авылының Церковная урамындагы 1 нче йорт янында килеп чыккан. Якынча мәгълүматлар буенча, 7 нче сыйныф укучысы дустының әнисенеке булган Apollo мотоциклы белән идарә иткән.

Дәүләт автоинспекциясе мәгълүматларына караганда, яшь йөртүче РФ Юл хәрәкәте кагыйдәләренең 10.1 пунктын бозган: транспорт чарасын даими контрольдә тотарга мөмкинлек бирүче куркынычсыз тизлекне сайламаган. Нәтиҗәдә, ул идарәне югалткан һәм мотоциклы белән ауган.

Авария вакытында үсмер төрле җәрәхәтләр алган, сөяге сынган. Аның йөртү таныклыгы булмаган.

Дәүләт автоинспекциясе ата-аналарга искәртә: тиешле таныклыктан башка мототранспорт белән идарә итү куркыныч һәм ул авыр нәтиҗәләргә китерергә мөмкин. Өлкәннәргә балигъ булмаган балаларның мотоциклларга, питбайкларга, мопедларга һәм башка мототехникага якын килү мөмкинлеген чикләргә кирәк.