Алабуга кешесе ЮХИДИ штрафларын вакытында түләмәгән һәм өчләтә сумма түләргә мәҗбүр булган

Җирле кешенең юл хәрәкәте кагыйдәләрен бозган өчен 11 500 сум күләмендә бурычы җыелган. Билгеләнгән вакыт эчендә ир-ат акчаны күчермәгән, шуннан соң суд приставлары РФ КоАПның 20.25 маддәсе (административ штрафны вакытында түләмәү) буенча эш кузгатканнар, дип хәбәр итә Россия Суд приставлары федераль хезмәтенең Татарстан Республикасы буенча Баш идарәсе.

Мировой суд материалларны карап карар чыгарды: бурычлы кеше барлыгы 34 500 сум түләргә тиеш. Бу сумма башлангыч бурычтан һәм штрафны түләмәгән өчен салынган икеләтә штрафтан гыйбәрәт. Бурычлы кеше акчаны суд утырышыннан соң ук түләгән.

Ведомство белгечләре искә төшерә: штрафларны вакытында түләмәү түләтү суммасының сизелерлек артуына китерә. Вакытында түләү — җиңелрәк тә, арзанрак та. Ә иң яхшысы — юл хәрәкәте кагыйдәләрен бөтенләй бозмау.