«Пир в мир» гастрофестивале кунакларын Алабугада равиоли белән сыйладылар

«Пир в мир» гастрономия фестивале Алабуга өчен күркәм традициягә әверелде — һәм менә инде 13 нче тапкыр ул кунакларны яңа ризыклары, якты хис-кичерешләре һәм җылы атмосферасы белән сөендерә.

Бу юлы фестиваль «Молодежный» стадионында узды — аны Яшьләр көнен бәйрәм итү белән берләштерделәр, һәм бу вакыйгага аерым масштаб һәм энергия бирде. Тәмле бәйрәмнең махсус кунагы — «Махеев» брендына нигез салучы һәм «Эссен Продакшн АГ» компаниясе учредителе Вадим Махеев булды. Әйтүенчә, равиоли дигән ризыкны беренче тапкыр пешерә. «Тик көлмәгез!» — дип елмаеп мөрәҗәгать итте ул тамашачыларга һәм энтузиазм белән эшкә тотынды, ләкин һәрвакыт гади өй кухнясы тарафдары булып калуын билгеләп үтте. 

Шимбә ризыгы — каймаклы-гөмбәле соуста томалап пешерелгән сыер ите белән равиоли иде. Шеф-повар пешерү серләрен дә ачты: серкә салынган һәм йомырканың сарысыннан гына басылган камыр, семола дигән он — каты сортлы бодайдан тарттырылган, камыр йомшак һәм үзле булсын өчен аны махсус аппаратта җәйделәр. 

Кунак белән шеф дуэт булып эшләделәр: равиоли ясадылар, кырыйларын йомырка сарысы белән беркеттеләр, параллель рәвештә гөмбә белән каймаклы соус әзерләделәр. Башта әзер равиолины тозлы суда пешереп алдылар, соңыннан гөмбәле-каймаклы соус салынган савытка салып болгаттылар. 

Безнең өчен ят булган әлеге ризыкны ашап караучылар бертавыштан «бик тәмле!» дип бәяләде.

Тамашачылар өчен шулай ук сыр заводына бару өчен ике сертификат уйнатылды.