Алабугада Яшьләр көнен зур бәйрәм белән билгеләп үттеләр

27 июньдә «Яшьләр» стадионы Яшьләр көнен бәйрәм итүнең төп мәйданчыгына әверелде. Бәйрәм бик эчтәлекле булды: бүләкләү тантанасы, интерактив мәйданчыклар, мастер-класслар, иҗат коллективлары чыгышлары һәм, әлбәттә, спорт өлеше — нәкъ менә шушы көнне биредә күпформатлы «Махеевъ Кама Фест» фестивале дә үткәрелде.

Рәхмәт сүзләре һәм лаеклы бүләкләр
Рәсми өлешне Алабуга муниципаль районы башкарма комитеты җитәкчесенең социаль үсеш буенча урынбасары Елена Мерзон ачып җибәрде. Ул җыелучыларны бәйрәм белән котлады, актив һәм максатчан булганнары өчен рәхмәт белдерде, шулай ук Яшьләр көнен тулыландырып торучы «Махеевъ Кама Фест» ны оештыручыларны аерым билгеләп үтте. Мәктәпне тәмамлаучы егет-кызларга җитәкче матур теләкләрен җиткерде.

Шуннан соң яшьләр секторы хезмәткәрләренә Алабуга муниципаль районы башлыгының рәхмәт хатларын тапшыру тантанасы булды.

Котлауларга «Лето» республика үзәге директоры Нина Шимина да кушылды. Ул ТР яшьләр эшләре министры Азат Кадыровның сәламнәрен җиткерде һәм Алабуганың Татарстанда яшьләр сәясәте флагманы, шулай ук балаларның җәйге ялын оештыруда лидер булып саналуын ассызыклады. Аннары ул бу өлкәне үстерүгә зур өлеш керткән кешеләргә бүләкләр тапшырды.

Алабуга районы башкарма комитетының яшьләр сәясәтен үстерү секторы мөдире Дарья Воронко да бу өлкәнең иң яхшы хезмәткәрләрен рәхмәт хатлары белән бүләкләде.

Мәйданчыклар, спорт һәм бүләк уйнату
Рәсми өлеш белән беррәттән, стадионда интерактив зоналар эшләде. «Барс» яшьләр үзәге музыкаль, бию, уен һәм спорт мәйданчыклары оештырган иде. Мисал өчен, «Юный десантник» яшүсмерләр-яшьләр клубы үз мәйданчыгында һәр теләүчегә кул сугышында (рукопашный бой) үз көчен сынап карарга мөмкинлек бирелде. Шулай ук яшьлек, хыял һәм мәхәббәт темасына багышланган фотозона да эшләде.

Бәйрәм кысаларында бүләкләр уйнату да узды: һәркем үз исеме язылган кәгазьне лототронга салып, бүләк ота алды. Моннан тыш, социаль челтәрләрдә #ДеньмолодежиЕлабуга2026 хештегы белән флешмоб ачып җибәрелде — анда катнашучылар да призларга лаек була алды.

Кичке программа
Кичке программаны Алабуганың иҗат коллективлары әзерләгән иде. Кичәгә аерым бер куәтне White Days төркеме бирде, аннары сәхнәгә «Сафари» кавер-группасы чыкты. Бәйрәм ахырында халык диджее Сөләйман көйләренә оештырылган дискотека оештырылды. Ул шулай ук шәһәр тарихында беренче тапкыр узган төнге йөгерешкә дә дөрес ритм бирде.