Алабуга мөселманнары Ураза бәйрәмен билгеләп үтте

Бүген, 20нче март көнне, мөселманнар ислам календаре буенча иң мөһим бәйрәмнәрнең берсе — Ураза бәйрәмен (Гайдел-фитыр) билгеләп үтәләр, ул изге Рамазан аеның тәмамлануын аңлата. Бәйрәм быел җомгага туры килде. Бу көн белән туры килү бәйрәмгә аерым әһәмият бирә, чөнки җомга мөселманнарда изге көн санала.

Дин тотучылар иртән иртүк мәчеткә күмәк бәйрәм намазы укырга җыелдылар. Алабугада төп тантаналар «Җәмигъ» мәчетендә узды.

Гыйбадәт кылу алдыннан Алабуга районы мөхтәсибе Хәлим хәзрәт Шәмсетдинов мәхәллә кешеләренә Татарстан Республикасы Мөселманнары Диния нәзарәте рәисе, мөфти Камил хәзрәт Сәмигуллинның котлау мөрәҗәгатен укыды. Шулай ук Алабуга районы башлыгы исеменнән сәламләү сүзе белән Авыл хуҗалыгы идарәсе башлыгы Рамил Садыйков чыгыш ясады. Ул җыелганнарны Ураза тәмамлану белән котлады, барысына да сәламәтлек һәм иминлек теләде: «Безнең ураза һәм Рамазан аенда башкарылган барлык изге эшләр Аллаһы Тәгалә тарафыннан кабул ителсен. Сезгә һәм якыннарыгызга ныклы сәламәтлек. Бердәм булыйк, дус булыйк».

Хәлим хәзрәт үзенең вәгазендә узган айның рухи яктан чистарыну, изге гамәлләр кылу һәм дин тотучыларның уртак ифтарларга берләшү вакыты булуын искә төшерде. Ул ассызыклаганча, игелекле гамәлләрне Рамазан аенда гына түгел, гомер буе эшләргә кирәк. «Чын мөселманнар бары тик яхшылык кына тарата. Аллаһы Тәгалә безне әти-әниебезгә ихтирамлы булырга өнди, — диде имам. — Бүген безнең үз динебезне өйрәнү өчен күп мөмкинлекләребез бар, һәм алардан файдаланырга кирәк. Аллаһы Тәгалә безгә тормышыбыз тынычлык һәм дөрес гамәлләр белән тулсын өчен ышаныч биргән».

Вәгазь тәмамланганнан соң, дин тотучылар бәйрәм намазына керештеләр. Бәйрәм шатлыгын диндәшләре белән уртаклашырга теләүчеләр шулкадәр күп булып чыкты ки, мәчет эчендә генә түгел, мәчет каршындагы урамда да намаз келәмнәре җәелде.

Шунысы да игътибарга лаек, быел Ураза бәйрәмен дин тотучылар яңартылган мәчеттә каршы алдылар. Нәкъ бер ел элек, узган бәйрәмдә, ремонт өчен акча җыюга старт бирелде. Бүген мөселманнар уртак тырышлык нәтиҗәсен күрделәр — «Җәмигъ» мәчете фасады тулысынча үзгәрде. Хәлим хәзрәт үз өлешен кертүчеләргә рәхмәтен белдерде, бирелгән һәр сумның Аллаһы Тәгалә игътибарыннан читтә калмаячагын һәм яхшылык белән кайтачагын искәртте.

Бәйрәм намазына төрле милләт кешеләре җыелды. Алар арасында Алабугага Дагыстаннан килгән Магомед Әнваров та бар иде. Ул инде 10 елдан артык ураза тота. Бүген намазга ул хезмәттәшләре белән килгән. «Туган йортыбыздан ерак булуыбызга карамастан, без монда, мәчеттә, намазда бердәм булу өчен. Күңелдә бүген җылы, һава торышы да сөендерә», — дип үз тәэсирләре белән уртаклашты ул.

Бәйрәм13:00 сәгатьтә «Чебурашка» паркында дәвам итәчәк. Анда Ураза бәйрәменә багышланган Гаилә бәйрәме узачак. Программада: мавыктыргыч уеннар һәм конкурслар, бүләкләр, балалар өчен күңел ачулар, татлы мамык һәм хуш исле бәйрәм пылавы.