Йөрәк кушуы буенча: МХО ветераннары дружинасына бер ел

Алар — хәрби хәрәкәтләр ветераннары, МХО катнашучылары. Кулларына корал тотып Ватанны саклаган кешеләр хәзер тыныч тормышта тәртип сакларга чыктылар.

Нәкъ бер ел элек район башлыгы Рөстәм Нуриев инициативасы белән Алабугада хәрби хәрәкәтләр ветераннарыннан Татарстанда беренче ДНД формалаштырылды. Бүген сафта — 36 кеше. Күпчелеге — махсус операциядә катнашучылар.

− Бирегә йөрәк кушуы буенча килдем. Хәзер читтә калырга ярамый торган вакыт, — ди беренче дружиначыларның берсе Дмитрий Чернышев. — Шартлар шундый — без бергә, бердәм команда булырга тиеш. ДНД — ул туганлык, без көн-төн ярдәмгә килергә әзер. Әйбәт егетләр җыелды, командир әйбәт.

Эш җитди. Дружина трассаны патрульли, күперләрнең терәкләрен карый, йөк машиналарын тикшерә. Стратегик объектларны, транспорт инфраструктурасын террорчылыктан саклауга аерым игътибар бирелә. Тиз реакция төркемнәре (ГБР), «Алабуга» МИЗ сакчылары һәм полиция хезмәткәрләре белән бергә эшлиләр.

− Безнең бурыч — трассаны патрульләү. Күперләрнең терәкләрен карыйбыз, бу мөһим объектлар, — дип сөйли өлкән дружиначы, МХО ветераны Евгений Рыбаков. — Башта машина йөртүчеләр машиналарын ачарга теләмәделәр, документларын күрсәтүдән баш тарттылар. Ләкин бер ел эчендә бер-беребезгә ияләштек. Хәзер очрашабыз, исәнләшәбез, барысы да яхшы. Һәм без бер ел эчендә тәҗрибә тупладык — якынча нинди автомобильнең шикле булуын күрәбез.

Күп кенә ветераннар өчен ДНДда катнашу − илгә тыныч тормышта ярдәм итү мөмкинлеге.

− Бер урында утыра алмадым, − ди дружиначы Тамерлан Рөстәмов. — Ватанны, гражданнарны алга таба да сакларга теләдем. Кешеләр үзләрен куркынычсыз хис итсен өчен.

Сүз уңаеннан, Алабуга дружинасының эше республика дәрәҗәсендә югары бәя алды инде. Россия Герое, Татарстан Хезмәт, халыкны эш белән тәэмин итү һәм социаль яклау министры урынбасары Рәсим Баксиков Алабугада булып, безнең тәҗрибәне башка районнарга үрнәк итеп куйды.

Эшнең беренче елы әлеге проектның реаль эшләүче структура булуын исбатлады. Армия дисциплинасы, хәрби теләктәшлек һәм көндәлек хезмәт дружинаны шәһәр һәм район өчен ышанычлы терәккә әйләндерде.