Татарстанлыларны аферистларның яңа хәйләләре турында кисәттеләр

«Хәзер мошенниклар акчаны банкоматтан алырга (наличка) һәм банкомат аша киредән үзләренең реквизитлары буенча күчерүне таләп итәләр», — дип сөйләделәр прокуратурада.

Алдан кешегә полициядән яки «финанс разведкасы»ннан шалтыраталар һәм язалар, ә аннары мәгълүматларның читкә таралуы турында хәбәр итәләр һәм җаваплылык белән куркыта башлыйлар. Шуннан соң корбанны банкоматка барырга, бөтен булган акчаны счеттан алырга, ә аннары мошенник әйткән башка счетка күчерергә күндерәләр.

«Курку хисе аек акылны җиңә. Пульс югары чиккә җиткәндә, баш мие куркынычтан арынуның иң тиз юлын эзли. Һәм бөтен акчаны күрсәтелгән счетка күчерү — котылу юлы сыман тоела», — дип аңлаталар ведомствода.

Әгәр сөйләшү борчу тудыра һәм таныш түгел кешенең әйткән һәр сүзен үтисе килү хисе уяна башласа, иң яхшысы — трубканы куегыз, дип киңәш итәләр прокуратурада.