Суда ял итү куркынычсыз булсын: Су коену кагыйдәләре һәм мөһим киңәшләр

Ләкин су янында булганда игътибарсызлык һәм төп кагыйдәләрне санга сукмау фаҗигале хәлләргә китерергә мөмкин. Үзегезнең һәм якыннарыгызның тормышын саклау өчен суда үз-үзеңне тоту буенча гади, ләкин бик мөһим кагыйдәләрне искә төшерәбез.

1. Су коенуның төп кагыйдәләре
Рөхсәт ителгән урыннарны сайлагыз. Бары тик махсус җиһазландырылган, коткаручылар дежур торган һәм су төбе тикшерелгән пляжларда гына коеныгыз.

Су температурасын исәпкә алыгыз. Суның температурасы +18 градустан түбән булса, озак коенудан тыелыгыз. Тән кинәт суынса, аяк-кулны көзән җыерырга мөмкин

Эсседә кинәт суга кермәгез. Кояшта озак кызынгач, суга тиз генә сикермәгез. Организмда температураның кинәт үзгәрүе йөрәк туктауга яки тамырлар спазмына китерергә мөмкин. Суга әкренләп, тәнне чылатып керергә кирәк.

Таныш булмаган урыннарда суга чуммагыз. Белмәгән урында суга сикерү куркыныч: бу урында су сай булырга мөмкин, төптә ташлар, агач тамырлары булып, умыртка сөяге яки баш җәрәхәте алу куркынычы зур.

2. Катгый рәвештә тыела
Иң мөһиме: Исерек хәлдә суга керү — судагы бәла-казаларның төп сәбәбе! Спиртлы эчемлекләр реакцияне начарайта һәм куркыныч хисен югалта.

Кабартыла торган матрасларга артык ышанмагыз. Матраслар, резин түгәрәкләр яки башка һава тутырылган уенчыклар ярдан еракка агып китәргә яки тишелергә мөмкин.

Суда шаярмагыз. Бер-береңне су астына батырып шаяру, аяктан тарту яки ялганлап «коткарыгыз» дип кычкыру куркыныч ситуация булдыра.

Көймәләргә һәм су транспортына якын йөзеп килмәгез. Скутерлар, моторлы көймәләр һәм катерлар янына якын бармагыз.

3. Балалар куркынычсызлыгы
Балалар су янында булганда, өлкәннәрнең игътибары максималь булырга тиеш:

Бала суга кергәндә аны бер мизгелгә дә күздән ычкындырмагыз.

Онытмагыз! Балалар суга тавыш-тынсыз бата. Шуңа күрә игътибарлы булыгыз, яннарыннан китмәгез.

Махсус жилетлар яки җиңсәләр кидерегез, ләкин алар да 100% гарантия бирми — төп гарантия сезнең игътибарыгыз!

4. Гадәттән тыш ситуациядә ничек эш итәргә?

• Әгәр көзән җыерса:

Паникага бирелмәгез, суга чалкан ятыгыз.

Еш һәм тирән сулыш алыгыз.

Көзән җыерган аякның бармакларын үзегезгә таба тартыгыз яки бармак очлары белән чеметеп алыгыз.

Әкрен генә яр тарафына таба йөзегез.

• Әгәр су агымы еракка алып китсә:

Агымга каршы йөзмәгез — көчегез тиз бетәчәк.

Агым буенча, ләкин әкренләп яр тарафына таба диагональ буенча йөзегез.

• Әгәр кемнеңдер батканын күрсәгез:

Иң беренче чиратта: 112 (Ашыгыч ярдәм хезмәте) номерына шалтыратыгыз яки коткаручыларны чакырыгыз.

Мөмкин булса, судагы кешегә коткару тәгәрмәче, озын таяк яки аркан ыргытыгыз.

Үзегезнең йөзү сәләтегезгә һәм көчегезгә 100% ышанмыйсыз икән, батучы артыннан суга сикермәгез — ул сезне дә үзе белән су астына тартырга мөмкин.

Исегездә тотыгыз: Су куркынычсызлыкны һәм җитдилекне ярата. Бу гади кагыйдәләрне үтәү — сезнең һәм якыннарыгызның тормышын, сәламәтлеген саклап калачак!