Лекарево авылында беренче тапкыр «Живые традиции» фестивале узды

Лекарево мәдәният йорты территориясендә беренче тапкыр «Живые традиции» фестивале узды.

Биредә ата-бабаларыбыз гасырлар, еллар аша саклап килгән йолалар һәм гореф-гадәтләр җанланды. Алабуга районы — күпмилләтле җир — биредә руслар, татарлар, керәшеннәр, удмуртлар, марилар дус-тату яши. Һәр халыкның үз уникаль йолалары бар, бу — туйлар, армиягә озату, балага исем кушу. Фестиваль кунаклары бу күптөрлелекне үз күзләре белән күрә алды.

Тантананы авыл җирлеге башлыгы Ирина Гарипова ачып җибәрде. Ул әлеге фестивальнең дә ел саен үткәрелә торган традициягә әйләнәчәгенә ышаныч белдерде һәм район башлыгы Рөстәм Нуриевка финанс ярдәме өчен рәхмәт җиткерде. Аның инициативасы белән ел саен милли бәйрәмнәрне торгызуга район бюджетыннан акча бүлеп бирелә — быел да 10 грант уйнатылды. Мәртәбәле кунаклар арасында — район башлыгы урынбасары Александр Косов, ветераннар советы рәисе Геннадий Баганов һәм мәгариф идарәсе җитәкчесе Алена Балобанова да бар иде. Алар авыл халкын котладылар һәм Лекаревода яшәүчеләргә бәйрәмне оештырулары өчен рәхмәт белдерделәр.

Кыз сорау
Лекарево кыз сорау күренешен тәкъдим итте. Музыка һәм такмаклар белән капка аша кияү белән кодачалар килеп керде, кәләшнең туганнарын сәламләп: «У вас товар, у нас купец», — диделәр. Егеткә төрле сынаулар үтәргә туры килде: ул тавык тотты да, гадәт буенча, бар булган байлыгын кәрзиннәргә салды. Кызның әтисе: «Тәмле ашат, яланаяк йөртмә», — дип әмер бирде.

Марилар йоласы: кызның баш киемен алыштыру
Иске Куклюк авылы халкы йоланы мари телендә тәкъдим итте. Туйның үзәк моменты — кызның баш киемен хатын-кызлар баш киеменә алыштыру. Бу йола яшерен рәвештә, туй ахырында, кияү йортында үткәрелгән. Кәләшне көнчыгышка караган килеш тәрәзә янына утырттылар. Остаз, учларына май сөртеп, үгет-нәсыйхәт әйтеп, кәләшнең чәчләрен сыйпый. Соңыннан кәләш чәчләрен ике өлешкә бүлеп, шынашовыч дип аталган баш киемен беркетәләр, ә аның өстеннән яулык бәйлиләр.

Керәшеннәрдә армиягә озату йоласы
Олы Шүрнәк авылы армиягә озату йоласын тәкъдим итте. "Озату кичәсе«нә туганнар һәм күршеләр җыела. Әнисе улына ипи кисәген кабтыра, калган өлешен солдат кире әйләнеп кайтканчы йортта саклыйлар. Авыл чигендәге капка янында саубуллашу — үзәк символ. Булачак солдатка кызлар чигүле яулык бүләк итәләр, егетләр аларны бәйләп, егетнең муенына кидерә. Әни кеше әлеге яулыкларны солдат кире әйләнеп кайтканчы саклый.

Свиногорье: баржага озату
Вяткадан ерак түгел урнашкан Свиногорье авылы кешеләре егетләрне баржага озатуларын күрсәттеләр. Коллектив хушлашу күренешен шаян куплетлар белән озатып барды: «Мы заехали в Танайку, заиграли в балалайку... Мы заехали в Котловку, а в Котловке люди ловки...». Балалайка һәм шаяртулар белән егетләрне елга буйлап ерак юлга озаттылар.

Җеп эрләү йоласы
Покровка авылы халкы тамашачыларны борынгы хатын-кыз хезмәте белән таныштырды. «Молодая пряха у окна сидит» җыры белән әлеге эшнең һәр нечкәлеген күрсәтә алдылар. Ләкин эрләү ул гади эш кенә түгел — ул кичләрен бер-берең белән аралашып, җырлап, серләрне уртаклашып утыру мөмкинлеге дә булган.

Кунак кабул итү йоласы
Йолалар күргәзмәсен «Инвожо» удмурт ансамбле кунак кабул итү йоласы белән тәмамлады. Барысы да музыкаль диалог форматында төзелде: кунаклар үзләренең көйләре белән килделәр, хуҗа аларны үз көе белән каршы алды. Өстәл артында кунак җырлары яңгырады, аннары — хуҗаларны мактаучы композицияләр, ә саубуллашканда — озатучы көй. Бу йола ачык күңеллелек һәм музыканың һәрвакыт халык аралашуының йөрәге булуын күрсәтте.

Лекарево авылында узган «Живые традиции» фестивале чын-чынлап үткәннәргә сәяхәт булды.