Алабуга районында төнлә ата-анасыз йөргән балаларга штраф яный

1 июнь-31 август аралыгында балигъ булмаганнарга 23:00 дән 06:00 гә кадәр урамда ата-аналарыннан яки законлы вәкилләреннән башка булу тыела.

Алабуга районының балигъ булмаганнар эшләре һәм аларның хокукларын яклау комиссиясе ата-аналарга һәм законлы вәкилләргә җәйге чорда балаларның иминлеген контрольдә тоту кирәклеге турында искәртте.

Татарстан Республикасының 71-ТРЗ номерлы Законы нигезендә, 1 июньнән 31 августка кадәр балигъ булмаганнарга 23:00 сәгатьтән 06:00 сәгатькә кадәр урамда ата-аналарыннан яисә законлы вәкилләреннән башка йөрү тыела.

Җәй айларында районда төнге профилактик рейдлар уза. Комиссия һәм профилактика хезмәтләре билгеләнгән таләпләрнең үтәлешен күзәтәләр.

Ата-аналарга алдан ук балалар белән сөйләшергә, аларга кагыйдәләрне аңлатырга һәм аларның куркынычсызлыгы өчен чикләүләрнең ни өчен мөһим булуын сөйләргә киңәш итәләр. Шулай ук өлкәннәргә йөрү вакытын контрольдә тотарга һәм баланың кичке һәм төнге вакытта кайда булуын белергә кирәк.

КДНда искә төшерүләренчә, 120-ФЗ номерлы Федераль закон буенча ата-аналар балаларны тәрбияләү һәм матди яктан карау өчен җаваплы. Ата-ана бурычларын үтәмәгән өчен РФ КоАП 5.35 маддәсе буенча административ җаваплылык каралган.

Элегрәк без Алабугада 44 балигъ булмаган бала профилактик исәптә тора дип язган идек.