Алабугада эшлекле визит белән Айдар Метшин булды

Эшлекле программа кысаларында Айдар Метшин Алабуга районы башлыгы Рөстәм Нуриев, шәһәр һәм район активы вәкилләре белән киңәшмә үткәрде, анда Алабуганың һәм тулаем төбәкнең үсеш стратегиясе, төп милли проектларны гамәлгә ашыру турында сөйләштеләр.

Доклад белән Алабуга районы башкарма комитеты җитәкчесенең икътисад буенча урынбасары Светлана Карлина чыгыш ясады. «Без Татарстан муниципаль берәмлекләренең социаль-икътисади үсеше рейтингында үз позицияләребезне саклап калудан тыш, икенче ел рәттән беренче урынны алып, үз позицияләребезне дә ныгыттык», — дип ассызыклады ул.

Айдар Метшин Алабуга районының Татарстан һәм Россия үсешенә керткән зур өлешен, фронтка ярдәм итүен билгеләп үтте һәм Алабуга халкының республика һәм федераль дәрәҗәдә кулланырлык тәҗрибәсе барлыгын ассызыклады. Үз чиратында, Рөстәм Нуриев республика һәм ил җитәкчелегенә күпьеллык ярдәмнәре өчен рәхмәт белдерде, шулай ук алга таба уртак эшчәнлеккә һәм проблемалы мәсьәләләрне уңышлы хәл итүгә өмет белдерде.

— Тарихи Алабуганы ярата торган кеше буларак, сезнең шәһәрдә еш булырга туры килде, — диде Айдар Метшин. — Бу юлы мин башка бурычлар: сезнең потенциалны үстерүгә ярдәм итү һәм Татарстанның төп төбәкләренең берсе тормышы белән танышырга дип килдем. Бүген мин үзем өчен берничә төп мәсьәләне билгеләдем, аларны хәл итәргә кирәк булачак.

Алабуга дәүләт музей-ядкарьлегенең Интеллект-үзәгендә махсус хәрби операциядә катнашучылар һәм ветераннар, шулай ук «Ватанны саклаучылар» фондының социаль координаторы Таңсылу Хөснуллина катнашында түгәрәк өстәл узды. Утырышта тернәкләндерү һәм социализация, эшкә урнаштыру һәм торак алу, сугышчыларга һәм аларның гаиләләренә матди ярдәм, шулай ук Алабуга ирекле халык дружиналары тәҗрибәсе турында фикер алыштылар.

Моннан тыш, Айдар Метшинга музей-ядкарьлекнең яңа объектларының берсе — «Эврика» балалар музей-мәгариф үзәген күрсәттеләр, анда кунак балалар белән аралашты.