Үткәннәрне истә тотып, киләчәккә ышаныч белән: Алабугада ветераннар оешмасы конференциясе узды

«Үткәннәрне истә тотарга! Бүгенге көн белән яшәргә! Киләчәк турында уйларга!» — Алабуга районы ветераннар (пенсионерлар) җирле иҗтимагый оешмасының эш девизы нәкъ менә шундый. 8 апрельдә әлеге оешманың сигезенче хисап-сайлау конференциясе узды.

Чарага багышлап чыгарылган «Ветеран» дигән төсле буклетның исеме дә нәкъ менә шундый иде. Анда Алабуга муниципаль районы башлыгы Рөстәм Нуриев ветераннарга сәламләү сүзе белән мөрәҗәгать итте. Ул Ветераннар советын «буыннар арасындагы ышанычлы күпер, бабаларыбыз батырлыгы турындагы җанлы хәтер һәм заманча иҗтимагый үсешнең актив катнашучылары» дип атады. Конференциядә чыгыш ясаганда Рөстәм Нуриев:

«Соңгы биш ел эчендә сез зур адым ясадыгыз, үрнәгегез, энергиягез һәм активлыгыгыз белән шәһәр һәм район тормышын кызыклырак иттегез. Ватанпәрвәрлекнең истәлекле даталар гына түгел, ә җәмгыять игелеге өчен көндәлек хезмәт булуын да күрсәтәсез», — дип ассызыклады.

Алабуга ветераннар армиясенең эшчәнлеген Татарстан ветераннары (пенсионерлары) региональ иҗтимагый оешмасы рәисе Хәбир Иштирәков югары бәяләде.

«Сез республикада беренчеләрдән булып куәтле иҗтимагый хәрәкәт төзедегез, аның башында ветеран-фронтовиклар, геройлар һәм орден ияләре торды. Шул вакыттан бирле сез җиңүчеләр истәлегенә тугры каласыз, тарихны кадерләп саклыйсыз. Сезнең эш тәҗрибәсе бәяләп бетергесез».

Хәбир Иштирәков Алабуга районы Ветераннар советы рәисе Геннадий Багановның хисап докладын һәм барлык чыгышларны эчтәлекле дип атады, Рөстәм Нуриевның эшчәнлеген билгеләп үтте, аңа хезмәтләре өчен медаль һәм рәхмәт хаты тапшырылды.

Ул көнне бүләкләнүчеләр аз булмады. Активистлар Надежда Наумова, Любовь Поспелова, Зәкәрий Минһаҗев, Иван Трофимов Алабуга районы башлыгының рәхмәт хатларына лаек булдылар. Ветераннар хәрәкәтендәге хезмәтләре өчен Геннадий Багановка һәм Любовь Котловага мактаулы билгеләр тапшырылды. Бүләкләнүчеләр арасында шулай ук Павел Пузырев, Икълимә Барышева, Дамир Мәрданов, Илиза Чернышева, Фрида Шакирова, Галина Мрясова, Любовь Агафонова, Людмила Рыбакова, Светлана Соколова, Николай Мельников, Эльмира Әхмәтова, Илшат Шәйморатов бар иде.

***
VIII Хисап-сайлау конференциясе карары белән ветераннар оешмасының хисап чорындагы эше канәгатьләнерлек дип табылды. Ветераннар советының составы расланды, аның рәисе итеп яңадан Геннадий Баганов сайланды. Шулай ук президиум, иҗтимагый комиссияләр һәм Региональ иҗтимагый оешманың Республика хисап-сайлау конференциясенә делегация составы расланды.

Беренчел ветеран оешмаларына матди-техник базаны ныгытырга, хәрәкәтне активлаштырырга һәм һәр хезмәт коллективында ветераннар почмакларын җиһазларга дигән киңәш яңгырады. Алабугада ветераннар хәрәкәтенә нигез салынуга 40 ел тулу уңаеннан оешма эшчәнлеге турында текст һәм фотоматериаллар әзерләргә дигән карар кабул ителде. Пенсионерлар арасында иреклеләр хәрәкәтен үстерү, «көмеш» волонтерларга социаль ярдәм күрсәтүдә ярдәм итү, төрле яшьтәге ветераннарга туры килерлек спорт программаларын булдыру һәм медицина темасына агарту эшләре алып бару да төп бурычлар итеп куелды.

Яшьләргә гражданлык-патриотик тәрбия бирү һәм Бөек Ватан сугышында Җиңү, локаль хәрби операцияләр һәм махсус хәрби операция турындагы тарихи хәтерне саклау буенча эшләр дәвам итәчәк. Ветераннарны оператив рәвештә хәбәрдар итү, методик материаллар бастыру һәм ветераннар хәрәкәте тарихын цифрлаштыру өчен район Ветераннар советының сайты булдырылачак.