Алабуга үзәк район хастаханәсе травмпункттагы чиратлар мәсьәләсенә ачыклык кертте

«Моңа кадәр бу табибларга алдан язылып, билгеләнгән вакытка килеп була иде. Хәзер − бары тик җанлы чират буенча гына эләгеп була. Мин бала белән дүрт сәгать чиратта утырдым. Кемдер кабул итүгә эләгергә тырышып, икешәр көн йөри», − дип яза мөрәҗәгать авторы.

Шул ук вакытта ул табибларга карата дәгъвалар юклыгын ассызыклый: «Ике табиб кабул итә. Аларга дәгъва юк − алар үз эшләрен эшлиләр, моның өчен аларга рәхмәт».

Төп канәгатьсезлек кабул итүне оештыруга бәйле. Шәһәрлеләр катнаш форматны карарга тәкъдим итәләр: пациентларның бер өлешен язылу буенча, бер өлешен җанлы чират тәртибендә кабул итәргә. Кабул итүгә кабат килүчеләр өчен әлеге мәсьәлә аеруча кискен тора.

Редакция Алабуга үзәк район хастаханәсенә рәсми сорау юллады.

Үзәк район хастаханәсе җавабы

Учреждениедә хәбәр итүләренчә, хәзерге вакытта травматология пунктында алдан язылу чыннан да юк, бу кадрларның җитмәве, нигездә иртәнге сәгатьләрдә мөрәҗәгать итүче беренчел пациентлар агымының зур булуы белән бәйле.

Аннары, белгечләр сүзләренчә, элек алдан язылуны кертү ярдәм мөмкинлеген киметүне күрсәткән: «Алдан язылу пациентлар чиратының киеренкелеген арттырды, бу табиблар эшенә тискәре йогынты ясады».

Медицина учреждениесендә шулай ук искәрттеләр: язылу тәртибе Татарстан Республикасы Сәламәтлек саклау министрлыгының 880 нче боерыгы белән көйләнә, аның нигезендә травматологка (ашыгыч профильле табиб буларак) беренчел мөрәҗәгать иткәндә язылу каралмаган.

Нинди чаралар күрелә

2025 елдан травмпунктта «Дружелюбный травмпункт» проекты тормышка ашырыла, аның кысаларында өстәмә кабинет ачылды. Бу пациентларны тикшерү һәм кабул итү вакытын кыскартырга мөмкинлек бирә.

Балалар өчен медицина тикшерүенең аерым эш сәгатьләре бүлеп бирелгән.
Хастаханәдә кабул итүне оештыру мәсьәләсе контрольдә калуын ассызыкладылар:

«Социаль челтәрләрдәге басмалар травмпунктның медицина персоналы белән тикшерелде, табиб-травматологлар һәм урта медицина персоналы белән тулысынча тәэмин ителү шартында аның эшен алга таба оптимальләштерү буенча беркадәр карарлар кабул ителде. Пациентларны кабат кабул итүгә алдан язылу турындагы мәсьәлә хәл ителәчәк».

Шулай ук җавапта травмпунктның эш режимы да күрсәтелгән иде:

көн саен 8:00дән 19:00га кадәр, ә шимбә көннәрендә − 8:00дән 14:00гә кадәр.

Үзәк район хастаханәсенең кабул итү бүлегендә ярдәм тәүлек әйләнәсендә күрсәтелә.

Медицина ярдәме буенча сорауларыгызны 8-908-338-36-89 телефоны буенча мессенджерга җибәрегез яки 3-81-11 номерына шалтыратыгыз. Җавапны без газетада бастырырбыз.