«Онытмаулары өчен рәхмәт»: Алабугада Шәмсия Мингалимованы котладылар

Яз — табигатьнең уянган бер матур вакытында без иң бөек бәйрәмнәрнең берсен — Җиңү көнен билгеләп үтәбез. Бу көннәрдә шәһәрләр һәм авыллар җылылык һәм хәтер атмосферасы белән тула. Без намуслы хезмәтләре һәм фидакарьлекләре белән илебезгә Җиңү һәм тыныч күк йөзе бүләк итүчеләрне искә алабыз.

Бәйрәм алдыннан Алабуга муниципаль районы башлыгы Рөстәм Мидхәт улы Нуриев Бөек Ватан сугышы ветераны, тыл хезмәтчәне һәм тынгысыз педагог Шәмсия Миннегәрәй кызы Мингалимованың хәлен белергә килде. Быел аңа 94 яшь тулды — әмма ул һаман да актив һәм яшәү дәрте белән тулы. Шәмсия апа кунакларны зур кунакчыллык белән каршы алды, шаяртты һәм һәркемгә яхшы сүзләр әйтте.

Рөстәм Нуриев ветеранга Татарстан Рәисе Рөстәм Нургали улы Миңнеханов исеменнән бүләк тапшырды, нык сәламәтлек теләде һәм аның сүнмәс энергиясе, тормыш зирәклеге һәм хезмәт сөючәнлеге өчен рәхмәт әйтте. Шулай ук Алабуга районы Ветераннар советы исеменнән Шәмсия Миннегәрәй кызын оешма рәисе Геннадий Баганов котлады.

Шәмсия Миннегәрәй кызы — чын татар хатыны: башында милли бизәкле матур яулык, ә күкрәгендә — медальләр һәм орденнар. Балачактан ук авыр хезмәткә һәм сынауларга күнеккән булса да, бүген ул туганнарының мәхәббәте һәм кайгыртуында яши.

— Минем яшемдә мине онытмаулары, шундый кунаклар килүе бик күңелле. Күптән түгел туган көнем булды: котлаулар Алабугадан да, республикадан да килде. Рәисебез Рөстәм Нургали улына да, башлыгыбыз Рөстәм Мидхәт улына да, барлык алабугалыларга да рәхмәт, — ди елмаеп Шәмсия апа.

Ул тормышны дөрес һәм гадел итеп алып барырга кирәк дип саный. Ә яшьләргә шундый киңәш бирә:

— Укыгыз, эшләгез, үзегезне кызганмагыз — шунда гына минем яшемдә сезгә дә хөрмәт һәм мәхәббәт килер.

Чәй табыны артында район башлыгы һәм ветеран күп кенә хатирәләрне яңарттылар. Мондый очрашу — сугыш һәм Җиңү турындагы тере хәтер китапларда гына түгел, ә һәр кешенең йөрәгендә саклануын тагын бер кат исбатлый.