Кайнар су ике атнага туктатыла, ә җылылыкны 10 апрельдә сүндерәләр: Алабугада кышка йомгак ясадылар һәм яңасына әзерләнә башладылар

Кышка алдан әзерләнәбез
Идарә итүче компанияләр, ресурс белән тәэмин итүче оешмалар, шулай ук барлык социаль әһәмияттәге объектлар — мәгариф, мәдәният, спорт, яшьләр сәясәте идарәләре белән киңәшмә уздырылды.

— Барлык бурычлар билгеләнгән һәм җаваплы затларга җиткерелгән, — дип билгеләп үтте Алабуга муниципаль районы башкарма комитеты җитәкчесенең инфраструктура үсеше буенча урынбасары Андрей Томилин. — Беренче чиратта, һәр күпфатирлы йорт һәм объект буенча планлы-искәртү ремонт графикларын төзергә кирәк. Бу — җылылык челтәрләрен юдырту һәм опрессовкалау даталары, төтен юллары һәм вентиляция каналлары буенча документлар әзерләү.

Хәзерге җылыту сезонына килгәндә, ул ахырына якынлаша. Якынча 10 апрельдә йортларда һәм социаль объектларда батареялар суына башлаячак.

— Кагыйдәләр буенча, уртача тәүлеклек һава температурасы биш көн дәвамында плюс 8 градус дәрәҗәсендә сакланганда җылылыкны сүндерәләр, — дип аңлата Андрей Томилин. — Март аенда, фаразлар буенча, җылылык штатлы режимда биреләчәк.

Алдагы сезонга әзерләнгәндә төп игътибар шәһәрнең тарихи өлешендәге вентиляция һәм төтен юлларына биреләчәк. Сәбәбе җитди: төзек булмаган система аркасында шартлаулар һәм янгыннар чыккан очраклар бар.

— Тагын бер мөһим таләп бар, — дип кисәтә Андрей Томилин. — Газ җиһазларына хезмәт күрсәтүче белгечләр йорттагы берәр фатирга керә алмаса, бөтен стояк буенча газны сүндерергә мөмкиннәр. Әгәр бер кранга ике-өч подъезд тоташтырылган булса — подъездлары белән сүндерәчәкләр. Бу — торак инспекциясе таләбе.

Кайнар су ике атнага булмаячак
18 майдан 31 майга кадәр Алабугада кайнар суны сүндерәчәкләр. Бу вакытка Алабуга җылылык челтәрләренең үзәк котельные туктатылачак.

— Узган ел без кайнар суны соңрак, июньдә сүндергән идек, — дип аңлата Андрей Томилин. — Гыйнварда опрессовка вакытында өзеклекләр күп булды, соңгы аварияне сентябрьдә генә бетердек. Мондый хәл кабатланмасын өчен, профилактика эшләрен алдан үткәрергә карар кылдык.

Яңа котельный бар инде, яңалары — планнарда
Узган ел шәһәрнең тарихи өлешендә яңа котельный эшли башлады. Җитәкче билгеләп үткәнчә, ул яхшы эшләгән, һәм аңа тоташтырылган күпфатирлы йортлар һәм социаль объектлар яшәүчеләреннән шикаятьләр саны сизелерлек кимегән.

Быел яңа котельныйлар төзелмәячәк, әмма Татарстан Рәисе исеменә 2027–2028 елларга ике объектны проектлау турында мөрәҗәгать әзерләнгән инде.

Беренчесе — Тугаров урамында. Анда 14 нче балалар бакчасы, 22, 24 һәм 44 нче биш катлы йортлар урнашкан. Котельный җиһазлары тузган — быел гына да дүрт авария булды. Якын арада Җылылык челтәрләре оешмасы (ПТС) анда котёлны алыштырачак, шулай итеп киләсе җылыту сезоны өзеклекләрсез үтәр дип көтелә.

Икенчесе — Үзәк район хастаханәсе территориясендә. Котельный бинасы һәм җылылык челтәрләре биредә авария алды халәтендә һәм файдалануга тапшырылганнан бирле алыштырылмаган. Котельный медицина шәһәрчеге объектларына һәм Землянухин урамындагы ике йортка хезмәт күрсәтә.

— Проектлау — озак процесс, әмма без киләчәккә өмет белән карыйбыз, — дип йомгаклады Андрей Томилин.