Алабугада «РайПо» мәйданчыгында чүп-чар өчен 230 беркетмә төзелде

Контейнер мәйданчыгы даими рәвештә чүп-чар белән тула. Шәһәр халкы кагыйдәләрне бозып, бирегә төзелеш калдыклары, зур габаритлы әйберләр, иске покрышкалар алып киләләр яки чүп-чарны контейнерлар яныннан ташлыйлар.

Алабуга районы башкарма комитетының муниципаль контроль бүлеге башлыгы Жанна Сармакова искәрткәнчә, чүп-чарны рөхсәтсез ташлау фактлары видеокамераларга теркәлә, алар буенча тикшерүләр үткәрелә, ә гаепле затлар җаваплылыкка тартыла. Ул хәбәр иткәнчә, ел башыннан «РайПо» мәйданчыгы буенча 230 беркетмә төзелгән, шуларның 15е — юридик затларга (100 мең сум), калганнары физик затларга (2000 сум). Тагын 80гә якын факт хәзерге вакытта тикшерү процессында. Шунысын да билгеләп үтәргә кирәк, хокук бозучыларга штраф кына түгел, чүп-чарны чыгару чыгымнарын да түләргә туры киләчәк (сумманы суд билгели).

Әйтергә кирәк, мәйданчыкта урнаштырылган контейнерларга тиздән тагын 18 чүп савыты өстәләчәк. Чүпне көнгә ике тапкыр төбәкнең «Гринта» операторы чыгара. Моннан тыш, Алабуга районының төзекләндерү һәм яшелләндерү идарәсе мәйданны даими чистарта.

Һәр микрорайоннан һәм шәхси сектордан эре габаритлы чүп-чар график буенча чыгарыла, аны идарәче компаниядә ачыкларга мөмкин. Шулай ук мондый чүпне алып китү өчен «Гринта» җәмгыятенә 8-937-576-97-00 телефоны буенча (8:00 дән 17:00 гә кадәр) заявка калдырырга мөмкин.