Алабугада «Пир в мир» гастрономия фестивале кысаларында чын Азия пылавы әзерләргә өйрәнделәр

Әгәр беренче шимбәдә алабугалылар удмурт кухнясы серләрен ачсалар, бу юлы оештыручылар барысын да Азия кухнясы буйлап сәяхәткә чакырды. Шимбә мастер-классының төп ризыгы — чын Азия пылавы булды.

Исегезгә төшерәбез, «Пир в мир» проекты кысаларында һәр шимбә көнне 12:00 сәгатьтә Ленин мәйданында Идел буе халыкларының милли ризыкларын әзерләү буенча кулинария мастер-класслары уза, шулай ук ярминкә һәм концерт мәйданчыгы эшли.

Фестиваль — җәлеп итү ноктасы 
«Купеческий городок» МАУ директоры Эльмира Туканова кунакларны сәламләде һәм фестиваль идеясе турында сөйләде:
— Һәр шимбәдә «Пир в мир» проекты биредә, Ленин мәйданында, медиа шәхес катнашында узачак, ул безнең шәһәр һәм бездә тормышка ашырыла торган проектлар турында сөйләячәк. Бүген искиткеч һава торышы. Безнең учреждение бу фестивальне мөмкин кадәр күбрәк кунаклар Алабуганың тарихи үзәге, аның тарихы һәм күпсанлы истәлекле урыннары булган сәүдәгәрләр шәһәре турында белсен өчен үткәрә. Монда ярминкә дә, концерт та, сый-нигъмәтләр дә, мастер-класслар да бар. Килегез!

Таҗикстаннан шеф-повардан пылау пешерү серләре
Шимбә мастер-классының шеф-повары Алижан Назаркулов булды. Алабугада ул инде күп еллар яши, әмма тумышы белән Таҗикстаннан. Нәкъ менә ул тамашачылар белән Азия пылавының нечкәлекләре белән уртаклашты.

Ашамлык составына үсемлек һәм җитен мае, ит (бу юлы сыер ите кулланылды), кишер, суган һәм дөге кергән. Алижан парланган дөге куллана.

— Пылауны гади дөгедә әзерләсәң, суны литр, парланган дөгегә бер литр ярым өстәргә кирәк. Гади дөгегә килограмм кишер, парланган дөгегә кило ярым китә. Парланган дөге пешкәннән соң бер ярым тапкырга арта, — дип уртаклашты шеф-повар.

Бүген сыйлау өчен 10 килограмм дөге әзерләнгән. Бу якынча 100-150 кешене ашату өчен җитә.

Алижан беренче тапкыр пылауны өченче сыйныфта ук пешергән, аны әтисе өйрәткән. Ә беренче зур пылауны туйга аңа унынчы класста ук әзерләргә туры килгән. Бүген, шеф әйтүенчә, бу ризыкка заказлар күп, хәтта башка шәһәрләрдән дә бар.

Татарстан халыклары традицияләрендә пылау
Фестивальнең махсус кунагы Татарстан халыклары ассамблеясенең Алабуга районындагы вәкиллеге директоры Зөләйха Эмирбекова булды. Ул кунакларны бәйрәмнәр белән котлады:

— Барыгызны да Нәүрүз бәйрәме белән котлыйм, әле кичә генә без мөселманнар бәйрәме — Ураза бәйрәмен билгеләп үттек. Төрки халыкларның, шулай ук дагыстанлыларның, яратып пешергәнҗ ризыгы — пылау. Ләкин пылау һәркемдә төрле, аның төрлелеге бик күп. Безнең лезгин пылавы чахер-аш дип атала. Ул бодай ярмасыннан әзерләнә: аны кыздыралар, вермишель өстиләр, кишер һәм суган белән итне аерым әзерлиләр, аннары барысын бергә кушалар. Барыгызга да ныклы сәламәтлек, зур бәхет һәм, иң мөһиме, баш өстендә тыныч күк йөзе телим.

Фестиваль кунаклары бу процессны күзәтеп кенә калмадылар, ә продуктларны: көнбагыш мае, җитен мае, суган, ит, су, кишер һәм дөге салуның дөрес эзлеклелеген дә истә калдырдылар. Ингредиентларның оптималь нисбәте: бер килограмм дөгегә — бер килограмм ярым ит һәм бер килограмм ярым кишер.

Кунаклар фикере
Мастер-класс башланганнан соң бер сәгатьтән алабугалылар хуш исле пылаудан авыз итә алдылар.

— Искиткеч тәмле пылау! Һава торышы яхшы, барысы да килеште. Оештыручыларга безнең шәһәрдә шундый матур бәйрәм ясаган өчен һәм бу ризыкны әзерләгән шеф-поварга рәхмәт. Мин үзем өчен бик күп файдалы нәрсәләр белдем. Тәмле һәм дөрес пылау әзерләү өчен билгеле бер шартларны үтәргә кирәк икән. Мин элек кишерне иртәрәк сала идем, соңрак кирәк икән. Өйдә һичшиксез бүгенге рецепт буенча пешереп карыйм. Киләсе юлы да монда килергә теләр идем, — дип хис-кичерешләре белән уртаклашты Люция Шәймәрданова.

Елена Нестеренко фестивальгә кызы һәм әнисе белән икенче тапкыр килгән:

— Киләсе ялларда фестивальгә һичшиксез киләчәкбез. Пылау бик шәп килеп чыкты. Минем өйдә ул һәрвакыт дөге боткасы кебек була. Бүген мин җитен мае өстәргә кирәклеген белдем һәм гамәлләрнең дөрес эзлеклелеген аңладым.

Атмосфера һәм киләчәккә планнар
«Пир в мир» фестивале — ул кулинария турында гына түгел. Мәйданда фермер продуктлары ярминкәсе оештырылды, анда һәркем күңеленә хуш килгән тәм-томнар сатып ала алды. Кунаклар өчен Алабуга артистлары чыгыш ясады: җырлар яңгырады, теләге булган һәркем бии һәм музыкантлар белән бергә җырлый алды. Аниматорлар бәйрәм кәефе тудырды, ә алып баручы, шоумен Григорий Галкин, тамашачыларга позитив бүләк итте.

Оештыручылар киләсе шимбәгә булган планнар белән дә таныштырды. Кунакларны яңа гастрономия тәҗрибәсе көтә — болан итеннән аш әзерләү буенча мастер-класс.

«Пир в мир»га килегез! Һәр шимбә Ленин мәйданында сезне яңа эмоцияләр, якты тәэсирләр һәм җылы аралашу көтә.