Алабугада «Җиңү юллары буйлап» концерты узды

Россиядә Бөек Ватан сугышы кагылып үтмәгән бер генә гаилә дә юктыр. «Кама» уку театрында ветераннарны, тыл хезмәтчәннәрен, сугыш балаларын һәм башка алабугалыларны җыйган чара булды. Чара авыр елларда Ватаныбызны саклаучыларның һәм сугыштан соң тыныч тормышны торгызучыларның истәлеген хөрмәтләү максатыннан оештырылды.

Алабуга мәдәният һәм сәнгать көллияте студентлары һәм педагоглары Бөек Ватан сугышындагы Җиңүнең 81 еллыгына багышланган күңелле һәм матур концерт әзерләгәннәр.

Алабуга районы башкарма комитеты җитәкчесенең социаль үсеш буенча урынбасары Елена Мерзон ветераннарны якынлашып килүче Җиңү көне белән котлады һәм бәйрәм программасына чакырды. Шулай ук ул үзенең гаилә тарихы белән уртаклашты:

«Сугыш турында без илебезне саклаган, үз хезмәтләре белән Советлар Союзын бөек индустриаль дәүләт иткән бабаларыбыз һәм әбиләребез сүзләреннән беләбез. Моның өчен сезгә тирән рәхмәтебезне белдерәбез. Безнең уртак миссия — бу хәтерне буыннан-буынга тапшыру. Минем әти 1937 елгы, ул сугыш турында сөйләргә яратмый иде. Хәрби форма кигән әтисенең аларны поездга утыртып җибәрүен генә искә ала иде. Соңрак алар Татарстан авылына килеп эләгәләр. Әтисез үскән солдат улының язмышы шулай Татарстанда кала. Әтинең: «Сугыш ул — әтисез булу», — дигән сүзләрен бүген башкалардан да ишеттем. Гаилә альбомыбыздагы берничә фотосурәт безнең өчен иң зур ядкяр булып тора», — диде ул.

Алабуга районы Ветераннар (пенсионерлар) советы рәисе Геннадий Баганов ветераннар исеменнән көллияткә концерт өчен рәхмәт белдерде. Ул бүгенге көндә тарихи дәвамчанлыкның ачык күренүен билгеләп үтте. «80 ел элек булган кебек, хәзер дә бу — барыбызның да уртак эше, анда олылар гына түгел, балалар да катнаша», — дип ассызыклады Геннадий Баганов.

Концерт барышында шулай ук Татарстан Республикасы ветераннары арасында үзешчән башкаручыларның «Балкыш» X республика фестивале җиңүчеләрен бүләкләү тантанасы булды. «Нәфис сүз» номинациясендә лауреат дипломы Наилә Низамовага тапшырылды.

— Мин сугыш еллары баласы, сугыш башлангач туганмын. Әтине фронтка алганнар, без әни белән икәү калганбыз. Мин әтине күрмәдем, ул мине күрмәде. Ләкин без үстек, исән калдык. Безне хезмәт белән тәрбияләделәр, һәм мин бүген үз хезмәтемнең нәтиҗәләрен күрәм. Казанга барып, үз яшемдәге катнашучылар арасында алдынгы урынны яулау өчен шартлар тудырган һәркемгә рәхмәт әйтәм, — дип сөйләде Наилә Низамова.