Алабугада җәйге мәдәни сезон: Борис Березовский фестивале һәм Цветаева укулары яңа форматта узачак

Алабуга быел да Россиянең мәдәни үзәкләренең берсе булып кала. Гөлзада Руденко билгеләп үткәнчә, сезонның төп вакыйгасы — 9-12 июльдә узачак «Алабугада җәйге кичләр» фестивале. Быел оештыручылар Борис Березовский җитәкчелегендәге дөньякүләм танылган музыкантларны гына түгел, бәлки Игорь Бутманның джаз оркестры кебек легендар коллективларны да көтә. Фестиваль программасы классикадан джазга һәм тангога кадәр төрле жанрларны үз эченә алачак.

— Хәзер без программа төзү өстендә эшлибез. Безнең тамашачыларны Игорь Бутманның джаз оркестры сөендерүен бик телим (анда хәзер Олег Акуратов уйный). Безгә Франциядән виолончелист Марк Дробинский һәм Бельгиядән Майкл Гутманның "Tango Quartet«ы килсен иде дип тырышабыз... Иң мөһиме — дөньядагы хәлләр моңа мөмкинлек бирсен. Узган юлы безгә барлык килешүләрне гамәлдән чыгарырга туры килде, быел ул хәл кабатланмас, дип өметләнәбез, — дип сөйләде Алабуга дәүләт музей-ядкарьлеге генераль директоры Гөлзада Руденко.

Шигърият сөючеләр өчен дә зур яңалык бар: 28 сентябрьдән 4 октябрьгә кадәр узачак Халыкара Цветаева укулары форматын үзгәртә. Инде ул фәнни форум гына түгел, ә бөтен шәһәрне колачлаган зур бәйрәмгә әвереләчәк. Ачык лекцияләр, танылган артистлар катнашындагы шигъри кичәләр һәм бердәм дәресләр Алабуга урамнарын тере поэзия белән тутырачак.