Алабугада 2200дән артык бала Ленин мәйданында Музейлар көнен билгеләп үтте

Алабуга дәүләт музей-ядкарьлеге һәм Алабуга мәдәният һәм сәнгать колледжы Ленин мәйданында балалар бакчаларында тәрбияләнүче 1013 бала һәм 1200 мәктәп укучысы өчен ачык һәм масштаблы чара оештырды.

Балаларны, аларның мөгаллимнәрен һәм ата-аналарны бәйрәм белән музей-ядкарьлек генераль директоры Гөлзада Руденко һәм ЕККИ директоры Людмила Рыбакова котлады. Яшь артистлар вокаль-бию һәм иҗади номерлар белән чыгыш ясады, ә Василиса Премудрая музей һөнәрләрен белү буенча викторина үткәрде.

Ләкин иң төп тамаша — «Иван Царевич һәм Соры бүре: бәхет эзләгәндә» интерактив спектакль-әкияте булды. Балалар геройлар белән бергә төрле сынауларны үттеләр, табышмаклар чиштеләр, уеннар уйнадылар.

— Безнең балалар ел саен «Музей һәм мәктәп» программасында һәм шушы бәйрәмдә катнашалар, — дип сөйләде 12 нче балалар бакчасының өлкән әзерлек төркеме тәрбиячесе Александра Ефимова. — Аларга музейларга йөрү, яңа һәм кызыклы нәрсәләр белү, конкурсларда һәм мастер-классларда катнашу бик ошый.

Төрле уен мәйданчыклары балаларны кызыклы бәйгеләр һәм ярышлар белән җәлеп итте. Балалар көянтә-чиләк белән су ташыдылар, скакалкада сикерделәр, куышлы уенында Бүре һәм Кәҗә рольләрен сынап карадылар, барабан кактылар.

Шулай ук теләүчеләр үзләренә басма-картинкалар, «Исәнме, җәй!» дип язылган кепка рәвешендәге түгәрәк открыткалар, үрелгән браслетлар, бөтерчек-уенчыклар ясый алдылар. Хәтта җеп графикасы техникасында «Матрешка» коллектив арт-объектын булдыруда да катнаштылар. Һәм, әлбәттә, беркем дә «Эссен Продакшн АГ» тарафыннан әзерләнгән татлы күчтәнәчләр алды.

Искәртеп үтәбез, «Музейлар көне — безнең бәйрәм!» чарасы ел саен 18 майда үткәрелә. Бу — «Музей һәм мәктәп» музей-мәгариф программасы курсын тыңлаучы Алабуга мәктәп укучылары һәм балалар бакчаларында тәрбияләнүчеләр өчен йомгаклау дәресе булып тора.