Алабуга Сабантуйга әзерләнә

Гадәттәгечә, аны шәһәр ипподромы кабул итә, ул бу көнне кабат гөрләп торган бәйрәм мәйданына әвереләчәк.

Сабантуй язгы кыр эшләре тәмамланганнан соң билгеләп үтелә. Авыл халкы өчен бу — чәчүдән соң җиңел сулап кую һәм чын күңелдән күңел ачу өчен көтеп алынган бер мөмкинлек. Оештыручылар күңелле концерт номерлары, матур киемнәр һәм милли рух белән үрелеп барачак шау-шулы, күңелле һәм истә калырлык бәйрәм вәгъдә итә.

Бәйрәмне һәрвакыттагыча ат чабышлары ачып җибәрә. Шуннан соң бай программа башлана. Алабуга районының мәдәният идарәсе җитәкчесе Эльмира Әхмәтова сөйләвенчә, программага милли уеннар, көрәш, җырлар һәм биюләр кертелгән.

— Без «Милләт хәзинәсе» дип аталган матур пролог әзерләдек, — ди Эльмира Әхмәтова. — Барыгызны да безнең Сабантуйда катнашырга чакырабыз.

Кунаклар өчен сәүдә рәтләре дә эшли. Аларда милли эшләнмәләр, тәмледән тәмле милли ризыклар тәкъдим ителәчәк. Елдагыча «Сабантуйның иң яхшы чатыры» конкурсы шәһәр һәм район предприятиеләрен, шулай ук уку йортларын бергә туплый. Авыл җирлекләре исә үзләренең милли ишегалларын тәкъдим итәчәк.

Уеннар һәм бәйгеләр яратучылар өчен капчык һәм көянтә-чиләк белән йөгерү, баганага менү, авызга кашык кабып йөгерү кебек уеннар әзерләнә.

Чакырылган йолдыз — Татарстанның атказанган артисты Фирдүс Тямаев.

Икенче көнне, 7 июньдә, Сабантуй бәйрәме районның Татар Дөм-Дөме, Илмәт һәм Морт авылларында дәвам итәчәк.