Алабуга Сабантуеның көрәш буенча Абсолют Батырларның исемнәре билгеле булды

Традиция буенча көрәшкә яшь спортчылар да, тәҗрибәле осталар да (алар арасында Россия һәм дөнья чемпионнары да бар) чыкты. 

Яшь көрәшчеләрнең чыгышлары аеруча кызыксыну уятты, алар өчен Сабантуйда җиңү киләчәк казанышларга мөһим адым булды. Танылган спорт гаиләсеннән булган бертуган Ислам һәм Булат Фәләховларның очрашуы киеренке һәм җитди булды. Яр Чаллы вәкиле Илдар Хәмитов матур һәм техник көрәш күрсәтте.

Финал ярышлары, әлбәттә, аеруча мавыктыргыч булды, аларда Сабантуйның төп призлары — автомобиль, мотоблок һәм традицион тәкә ияләре билгеләнде.

Җиңүчеләргә бүләкләрне Алабуга районы башлыгы урынбасары Александр Косов тапшырды.

— Мин барысына да, бүген безнең белән булганнарның барысына да рәхмәт белдерәм. Һава шартларына карамастан, яңгыр туктамас кебек тоелса да, без көрәшнең нәтиҗәләрен көттек. Көрәш тәмамланды. Мин шәхсән үз исемемнән һәм район башлыгы Рөстәм Нуриев исеменнән бүгенге җиңүчеләрне котлыйм, — диде ул.

Котлауларга «Сабантуй гүзәле» конкурсы җиңүчесе Алсу Михаметҗанова да кушылды, ул да призерларга бүләкләр тапшырды.

2026 елда 16-18 яшьлек егетләр арасында абсолют батыр булып Билал Галимов танылды. Җиңүчегә 75 мең сумлык сертификат, мотоблок һәм тәкә тапшырылды. Яшь спортчы өчен бу уңыш күпьеллык хезмәт нәтиҗәсе булды.

— Тырышып шөгыльлләнүемнең юкка булмавын аңладым. Көн саен икешәр сәгать шөгыльләндем. Бу җиңүгә бик шатмын. Көрәш катлаулы булды, чөнки барлык көндәшләр белән мин яхшы таныш, аларның күбесе минем дусларым. Финалда минем алымнарны белгән сыйныфташым белән көрәштем, шуңа күрә җиңел булмады. Бу җиңүгә мин озак бардым -инде ун ел көрәш белән шөгыльләнәм, күп ярышларда катнаштым, җиңелүләр дә булды. Узган ел оттырдым, ә быел үз максатыма ирешә алдым. Әти мине хуплады һәм барлык тырышлыкларымның юкка булмавын әйтте, — дип уртаклашты Билал Галимов.

Ир-атлар арасында быелгы Сабантуйның абсолют батыры исемен көрәш буенча дөнья чемпионы Илнар Галимов алды. Аңа «Лада Гранта» автомобиле тапшырылды.

— Хисләр, һәрвакыттагыча, әйтеп бетерерлек түгел. Без һәрвакыт җиңүгә омтылабыз. Имгәнүдән соң мин ел ярым шөгыльләнмәдем, шуңа күрә бу ел гади булмады. Ләкин хәлиткеч бәрелешкә яхшы әзерләнү насыйп булды. Җиңү беркайчан да җиңел бирелми. Көрәш белән шөгыльләнүне дәвам итәчәкмен, чөнки тәнәфес вакытында миңа моның ни дәрәҗәдә җитмәвен аңладым. Илдар Хәмитов белән миңа көрәшергә туры килгәне бар иде инде, ул бик көчле һәм титуллы спортчы. Әмма туган шәһәреңдә атмосфера үзе һәм җанатарларның ярдәме бик булыша. Бу машина минем спорт карьерамда инде уникенчесе, — дип сөйләде җиңүче.

Бүгенге көндә Илнар Галимов спорт мәктәбен җитәкли, шуңа күрә күп вакытын административ эшкә багышлый. Әмма тәҗрибәле спортчы көрәшчеләрнең яшь буынын өйрәтүен дәвам итә.

— Спорт үсеше секторы җиткәчесе Илнар Гыйлемхан улы Галимов белән бергә без яшь спортчыларны өйрәтәбез, аларга тәҗрибә бирергә һәм дөрес ориентирлар бирергә тырышабыз. Билал — нәкъ менә үсеп килүче буын вәкиле. Бездән соң егетләрнең җиңүләрен дәвам итүләрен һәм иң югары дәрәҗәдәге ярышларда районыбыз исеменнән лаеклы чыгыш ясауларын телибез, — диде абсолют батыр.