Алабуга районында «Безнең ишегалды» республика программасы төгәлләнә

Бу хакта шәһәр хуҗалыгы буенча киңәшмәдә АМР башкарма комитеты җитәкчесенең инфраструктура үсеше буенча урынбасары Андрей Томилин хәбәр итте. Сүз уңаеннан, бу юлы киңәшмә киңәйтелгән форматта − шәһәр Советы депутатлары катнашында узды.

Ишегалларын төзекләндерүнең йомгаклау схемалары яшәүчеләр белән инде расланган. Бу елга лимит — 38 миллион сум. 30 миллион юл өслегенә, 3,7 миллион сум кече архитектура формаларына һәм яктыртуга юнәлдереләчәк.

Апрель аенда подрядчылар эшкә керешәчәк. Машина юлын ремонтлау, яңа парковка зоналары урнаштыру, шулай ук подъездлар буйлап та, балалар мәйданчыклары эчендә дә тротуар челтәрләре салу планлаштырылган.

Эшләр 15 августка тәмамланачак дип көтелә.

Шунысын да билгеләп үтәргә кирәк, программа гамәлдә булган биш ел эчендә (2020-2025 еллар) Алабуга районында «Безнең ишегалды» программасы кысаларында 201 ишегалды тәртипкә китерелгән. Бу вакыт эчендә финанслауның гомуми күләме 1 миллиард 148 миллион сум тәшкил иткән. «Безнең ишегалды» программасына 2014 елга кадәр тапшырылган йортлар эләгә иде. Районда эре ишегаллары ремонтланды, зур булмаган объектлар калган. Әмма, Андрей Томилин билгеләп үткәнчә, 2014 елдан соң файдалануга тапшырылган ишегалларын төзекләндерүгә дә ихтыяҗ бар. Сүз нигездә балалар һәм спорт мәйданчыкларына асфальт түшәү һәм төзекләндерү турында бара. Андый ишегаллары — тугыз. Мәсәлән, Мәрҗани урамындагы 22 нче йорт. Анда юлны җирле бюджет кысаларында ясаганнар, әмма хәзер асфальтның сыйфаты яхшы түгел, кече архитектура формалары да яңартуны таләп итә.

Быел түбәндәге адреслар буенча ишегалларын яңартачаклар:

Тойма урамы, 21А йорт

Бехтерево авылы, Гусев урамы, 25нче йорт

Тойма урамы, 18нче йорт

Матросов урамы, 5нче йорт 

Матросов урамы, 13нче йорт

Матросов урамы, 7нче йорт

Матросов урамы, 11нче йорт

Матросов урамы, 3нче йорт

Матросов урамы, 9нчы йорт

Свердлов урамы, 93Б йорт

Татарстанның 10 еллыгы урамы, 11нче йорт

Татарстанның 10 еллыгы урамы, 24А йорт

Мәскәү урамы, 48нче йорт